المساعد الشخصي الرقمي

مشاهدة النسخة كاملة : الدايات .. ضمن قائمة أفضل مائة مستشفى ولادة في العالم


عبد الرحمن فاروق
10-28-2009, 09:22 AM
نالت مستشفى الدايات بأمدرمان بنيلها جائزة التميز الطبي

ضمن افضل مائة مستشفى ولادة في العالم

والتي نظمتها المستشفيات الإيرلندية للعام 2009

كأول مستشفى في قارة أفريقيا والوطن العربي ينال هذه الجائزة

وذلك في مجالات التميز بالخدمات الطبية والأداء الإداري للمرافق الصحية

حيث كان التنافس لنيل الجائزة على خفض نسبة وفيات الأمهات والأطفال

حسب توصيات هيئة الصحة العالمية .. والرامية إلى خفض نسبة وفيات الأمهات

بنسبة 75% خلال 25 سنة من 1990 - 2015

إلا أن المستشفى استطاع أن يخفضها خلال خمسة سنوات فقط إلى نسبة 87%

كذلك خفض نسبة وفيات الأطفال من 60 طفلاً في الألف إلى 12 طفلاً في الألف

مما دفع لجنة حكماء الجائزة بالإجماع على فوز مستشفى الدايات بكأس التميز الطبي بدرجة الامتياز

مع منحه شهادة الأداء الإداري الممتاز

** صحيفة الوطن عدد اليوم 28 أكتوبر 2009**
**بتصرف**

AZZA
10-28-2009, 09:29 AM
خبر جميل جداً وده فخر لينا (أول مستشفى في قارة أفريقيا والوطن العربي
ينال هذه الجائزةوذلك في مجالات التميز بالخدمات الطبية والأداء الإداري للمرافق الصحية)
اكيد الخبره الطويلة في المجال أدت الي تحسين مستوي الخدمات
لك الشكر عبدالرحمن لتعريفنا بهذا الانجاز ولهم الاحترام والتقدير علي ما يبذلوه من جهود
من أجل الوصول الي افضل الخدمات

منية الله
10-28-2009, 09:56 AM
ده خبر أكتر من جميل، ومفاجئة عديل كده ما متوقعة ولا في البال.. الحمد لله
تسلم يا عبد الرحمن

عبد الرحمن فاروق
10-28-2009, 10:10 AM
شكراً عزة ... شكراً منية

حقيقة هو فخر لكل سوداني

وهو إنجاز يحسب لإدارة المستشفى

برغم الظروف السيئة التي يعانون منها

ولكنهم اهتمو بالتدريب خاصة في إيرلندا

وذي البيعملو من الفسيخ شربات

والحمد لله وعن تجربة كل أبنائي الثلاثة كانو من الدايات أمدرمان

ولدي قصة مع أبني الكبير محمد

كنت مسافراً إلى الأردن وفي نفس يوم السفر

تعبت زوجتي وتم نقلها إلى المستشفى الأكاديمي بالامتداد لمجاورته للمنزل

تمت الإسعافات الأولية والفحوصات

وحدد لها الطبيب إجهاض وكانت في أول الشهر الثامن

وتم تحويلها لمستشفى الولادة بالخرطوم

في مستشفى الخرطوم أيضاً إجهاض

ورفضت أم محمد وأصرت على مقابلة طبيبها وهو بروفسور والله لا أذكر أسمه الآن

وفعلاً ذهبت له في المستوصف وأصر أيضاً على الإجهاض لارتفاع الضغط أظن

وحولها إلى مستشفى الدايات بأمدرمان

وقابلت هناك الطبيب الإنسان أحمد عمار

وقالت ليهو والله ولدي ده شلتو الزمن ده كلو أصلاً ما بنزلو

قال ليها القال ليك دايرين ننزلو منو

وفعلاً أداها أدوية ورقدها في العنبر وحتى شكل الرقدة

وعلى ياتو جنبة حددها ليها

وبيجيها في اليوم أكتر من مره

وده كلو وأنا بره البلد

أتصل علي زميلي بالمكتب وكان متابع معاها

وهو الوراني أنو في خطورة على حياتها

قلت ليهو قول للدكتور ما تشتغل بيها أجهض بس

وقال للدكتور كده قال ليهو لو حسيت للحظة أنو في خطورة على حياتها

ما بشاوركم حتى

وكل مره موجات صوتية ويعملها براهو

وأول يوم في الشهر التاسع فتح البطن وجاء محمد (الله يحفظو)

وتاني أي حمل حصل كانت المتابعة مع أحمد عمار

رغم أنو عياتو كانت في الثورة الحارة العاشرة

وحالياً في شارع الدكاترة أمدرمان

الطاهر عثمان
10-28-2009, 10:23 AM
خبر جميل والله وبادرة امل مفرحة
بالفعل الخبرة والادارة الجيدة هي المفتاح
ياريت لو الوزارة تتلقى الخبر ده بتحسين اوضاع العاملين ورواتبهم وتعطي مزيدا من الاهتمام بالمستشفى ليستطيع اكمال دوره

فاطمة
10-28-2009, 10:49 AM
اكيييد...وزي ماذكرت لي اخونا البشير قبال كدا...في بوست سابق ...انو ماااافي افضل من الدايات وعن تجربة ولادة ابنتي ريوم...بالجد لاتفرق عن مستشفي دبي الحكومي(واقصد الجناح الخاص اللي دخلتو انا) اي شي ..لاتفرق..الا في العمالة وبس..لكن نفس الاسلوب والنظام المتبع ....واااااحد...بس اكيد تحتاج شوييييية تعب برة البوابة...تحياتي اخونا عبدالرحمن...ودا فخر لينا جميعا...اخيرا سوووا شي سمح ما يغالطوهم فيييهو....هههههه

عبد الرحمن فاروق
10-28-2009, 01:40 PM
خبر جميل والله وبادرة امل مفرحة
بالفعل الخبرة والادارة الجيدة هي المفتاح
ياريت لو الوزارة تتلقى الخبر ده بتحسين اوضاع العاملين ورواتبهم وتعطي مزيدا من الاهتمام بالمستشفى ليستطيع اكمال دوره

عارف يا الطاهر

لو بس اهتمت الحكومة بي تدريب الناس دي

وهم أسع كويسين

بيود الناس تتدرب في (جامعة كوك) بإيرلندا

عشان عندهم معاهم برنامج توأمة منذ عام 2005

تدريب الاطباء والقابلات والسيسترات

ودعم عيني (حضانات أطفال وتجهيزات معامل)

من ناحية قروش ما فارقة كتير

ياخ البتلز النقالة ساكات دايرة خلي البتولد

منية الله
10-28-2009, 01:45 PM
والله قصة ومعاناة عديل كده.. الحمد لله ربنا سلم وربنا يحفظ ليك اولادك

الفاضلابي
10-28-2009, 03:12 PM
خبر جميل والله جدا وفخر ربنا يزيد في التقدم خصوصا ان مثل هذه المستشفيات تخصصها حساس فيه حياة وموت للمسكينات ديل ربنا يزيد في الخير

مشكور اخ عبد الرحمن على نقل الخبر الجميل

نهي الطيب
10-28-2009, 03:40 PM
سبحان الله
خبر جميل جدابالجد افرحتنا ياعبد الرحمن وربنا يزيدنا كمان وكمان,
والشهادة لله م.الدايات مافي زيها اهتمام من كل النواحي وتعرف ياعبد الرحمن انا اول فترة في الامتياز لي كانت في الدايات وحقيقة كل المستشفيات الاشتغلت فيها لاتقارن من كل النواحي والشغل الاشتغلناه في الدايات لاينسي رغم التعب والارهاق تخيل يوم النبطشية بننوم ساعتين بالمساء علي الرغم من عدد الاطباء الكبير ومش نحن ناس الامتياز حتي النواب كان الواحد بينوم ساعتين فقط بالتناوب والاخصائي بيكون قاعد في المستشفي مازي المستشفيات التانية الاخصائ فيها بيجي نصف ساعة بالكتير.ربنا يزيدنا كمان وكمان.

باكر أحلى
10-28-2009, 03:49 PM
صحيح اننا شعب يصنع من الفسيخ شربات ولكن بايماننابمانفعله فقط يصبح المستحيل اول الممكن ،،، هنالك مقايسس لاتعتمد الشكليات فاذا قامت هذه اللجنة مثلاً اخذ المباني والتاسيس او مثل هذه العايير لكانت تسكن هذه المستشفى العريقة هادئة في زيل القائمة دون منافس فالتحية للمستشفى أولاً وثانياً لهذه اللجنة التى لاتشبة لجنة (نوبل)؟؟؟

هنوها
10-28-2009, 11:52 PM
http://www.uparab.com/files/TXB8KWMVLmlwmGeV.jpg





تسلم للخبر الحلو