المساعد الشخصي الرقمي

مشاهدة النسخة كاملة : حماسيات من الزمن الجميل( تراث وحاضر)


هنوها
05-02-2010, 08:35 AM
http://www.dohaup.com/up/2010-05-02/dohaup_1352889549.jpg (http://www.dohaup.com/)




ماهو الفافنوس
شاعرة هذه القصيدة هي بنونه بت المك نمر مك الجعليين والذي احرق إسماعيل باشا في تلك الواقعة التاريخية المشهورة ، ولقد قالت هذه القصيدة في أخيها عمارة والذي مات على فراش المرض ولم يمت في ساحة الوغى والنزال كما كانت تتمنى له ، حيث كانت تريده متوشحا بدمائه في يوم القتال والحرب حيث انه كان رجلا شجاعا ومقداما وبطلا

ما هو الفافنوس ماهو الغليد البوص
ود المك عريس خيلا بجن عركوس
احى على سيفه البحد الروس
********
ما دايرالك الميته أم رمادا شح
دايراك يوم لُقاء بدميك تتوشح
الميت مسولب والعجاج يكتح
احى على سيفه البسوى التاح
*******
إن وردن بجيك في أول الواردات
مرنا مو نشيط إن قبلن شاردات
أسد بيشه المكرمد قمزاته متطابقات
وبرضع في ضرايع العنز الفاردات
*********
كوفيتك الخوده أم عصا بولاد
ودرعك في أم لهيب زى الشمس وقاد
وسيفك من سقايتو استعجب الحداد
وقارحك غير شكال ما بقربه الشدّاد
*********
يا جرعة عقود السم
يا مقنع بنات جعل العزاز من جم
الخيل عركسن ما قال عدادن كم
فرتاق حافلن ملاى سروجن دم

===========================================

http://www.dohaup.com/up/2010-05-02/dohaup_347378382.gif (http://www.dohaup.com/)
[SIZE="6"]
فرتيقت أم لبوس


فرتيقت أم لبوس لويعة الفرسان
الليل ما بليل عنزة وقرونها سنان
كوراك ضرب مرقن جداد الدار
وسيفك في قضاريف الرجال صياد
كوفيتك الفودة أم عصا بولاد
ودرعك في أم لهيب زي الشمس وقاد
وسيفك من سقايتو استعجب الحداد
جابو لنا الكرامة وصبحنا فرحانين
ضربوا دنقرهم جوني العيال مارقين
بسأل عن علي الفارس البيقود تسعين
يا هو علي الولد البيقود تسعين
هو اللدر العلي ظهره الخبوب و الطين
ما بياكل الضعيف ومابيسولب المسكين
الا سيبت الأسد المقابل الطين
أنداد النصارى الكلهم بولاد
كرار علي كبر عليهم زاد
* * * * * * * * * * *

http://www.youtube.com/watch?v=uWggKd_CxBk&feature=related


================================================== =======
http://www.dohaup.com/up/2010-05-02/dohaup_1710994909.jpg (http://www.dohaup.com/)
بتريد اللطام
وهذه الأبيات كتبتها الشاعره رقيه أخت ود حبوبه حيث صوّرت لنا فيها فراسة البطل عبدالقادر ود حبوبه ومشهد المحكمه والاعدام ومن ثم مشهد القبر حيث دفن بقرية (مصطفى قرشي ) وهي من قرى منطقة الحلاويين .

بتريد اللطام

بتريد اللطام أسد الكداد الزام
هزيت البلد من اليمن للشام
سيفك للفقر قلاّم

*****

ديّم فى التقر أنصارو منزربين
بالصفا واليقين حقيقة أنصار دين
بالحرب أم طبائق قابلو المرتيين
فى وش المكن رقدوا التقول نايمين

*****

ديّم فى التقر أنصارو زاربنو
بعهدوا القبيل بي عيسى تاهمنو
إتلموا العمد ليهم نقر سنو
الهوج والشرق طار المنام منو

*****

ديّم فى التقر قال العمير للسوم
القوي والضعيف من عينو طار النوم
الكفرة النجوس ما بختوا من اللوم
حجرت الدرب خليت جمالهم تحوم

*****

الأسد النتر وقال الدين منصور
لمولو الأورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور

*****

الأسد النتر بي جيهة الأبقار
لمولو الأورط شايلين سلاح النار
ود حبوبه قام ورتّب الأنصار
فى متفيه ديك كم شبعن صقّار

*****

الإعلان صدر واتلمت المخلوق
بي عيني بشوف أب رسوه طامح فوق
كان جات بالمراد واليمين مطلوق
ما كان بتشنق ود أب كريق فى السوق

*****

الإعلان صدر وإتلمت الحلال
نصبولوا السلاح وإتكرنف الخيال
قدر الله الحصل والزمن ميّال
منسول من أبوك ماك ودحرام دجّال

*****

بتكلم بقول بوريك شّن حسبو
نايبو السنين منّو الرجال حسبو
كل الخاصموك فى الآخره ما كسبو
التبعوك جنود لله ما انتسبو

*****

رضوان الإله تملأ الضريح كافور
مسك الرحمه لاح منو يلوح النور
أغفر سيئات كل من يجيك يزور
فى الفردوس هناك يتمنى مهما يدور







==================================================
http://www.youtube.com/watch?v=HZsQzUvptSEhttp://www.youtube.com/watch?v=HZsQzUvptSE



انا ود المك على فخر اولاد نمر

نار الكم كلي من حر الكى بجى انا ود المك على فخرة اولاد نمر
نار اكم كلى من حر الكى بجى انا ود المك على فخرة اولاد نمر

وقت الباشا جاهو و لكزو بالكدوس لقو الباشا وافى ولما قدوس
زول بن ناس خدر طفاى نار المجوس انا ود المك على حوافر الخيل بدوس

نار الكم كلى من حر الكى بجى انا ود المك على فخرة اولاد نمر

اى كان يكون والكاين بقا فى عز دار جعل فى الراس بطبقة
ما بقبل عوج كدا طيبة طبقة انا ود المك على عين الحاسد بقلقة

نار الكم كلى من حر الكى بجى انا ود المك على فخرة اولاد نمر

ما قالو لو هوج فزعوهو طور بكر كوح معجاج مرقوشور حكر
سوى اللوم بدع فى الغازى مانسكر انا ود المك على باسقى المر عكر

نار اكم كلى من حر الكى بجى انا ود المك على فخرة اولاد نمرنار الكم كلي من حر الكى بجى انا ود المك على فخرة اولاد نمر
نار اكم كلى من حر الكى بجى انا ود المك على فخرة اولاد نمر

وقت الباشا جاهو و لكزو بالكدوس لقو الباشا وافى ولما قدوس
زول بن ناس خدر طفاى نار المجوس انا ود المك على حوافر الخيل بدوس

نار الكم كلى من حر الكى بجى انا ود المك على فخرة اولاد نمر

اى كان يكون والكاين بقا فى عز دار جعل فى الراس بطبقة
ما بقبل عوج كدا طيبة طبقة انا ود المك على عين الحاسد بقلقة

نار الكم كلى من حر الكى بجى انا ود المك على فخرة اولاد نمر

ما قالو لو هوج فزعوهو طور بكر كوح معجاج مرقوشور حكر
سوى اللوم بدع فى الغازى مانسكر انا ود المك على باسقى المر عكر

نار اكم كلى من حر الكى بجى انا ود المك على فخرة اولاد نمر

================================================== ==========
أنا اخو البت اللكعت قرن الخمرة النازة, د.محمد بادى
http://www.youtube.com/watch?v=UR4s6DqoWLs&feature=player_embedded
http://www.dohaup.com/up/2010-05-02/dohaup_492900388.jpg (http://www.dohaup.com/)




وبنواصل

سوزي
05-02-2010, 09:15 AM
احييك على هذا البوست المهم ومتابعين معاك
بس بصراحة في كلمات عاوزة قاموس

هنوها
05-02-2010, 09:44 AM
http://www.dohaup.com/up/2010-05-02/dohaup_842335436.gif (http://www.dohaup.com/)


شدوا لك ركب ..فوق مهرك الجماح
ضرغام الرجال... الفارس الجحجاح
السم النقوع...للبدن نتٌاح
تمساح الدميرة ..الما بكتلو سلاح
عصار المفازة ..للعيون كتاح
المال ما بيهمو ...إن كتر وإن راح

#####

أبواتك جبير بيسدوا ل...لعوجات
مطمورتك تكيل للخالة والعمات
في الجود والكرم إيديك دوام بارزات
ويا أب قلباً حديد في الحوبة ما بتنفات

#####

بطناً جابتك والله ما بتندم
أسد الكداد الفي خلاكَ رزم
ويا رعد الخريف الفوق سماك دمدم
بابك ما انقفل نارك تجيب اللم
ما بتعزم تقول غير استريح حرٌّم

#####

عينيك يا الصقر في الحاره ما بتنوم
صدرك للصعاب دايماً بعرف العوم
في وسط الفريق في الفارغة ما بتحوم
لا بتتلام ولا بتعرف تجيب اللوم
ود ناساً عُزاز جمعوا المكارم كوم
تفخر بيك بنات البادية والخرطوم
http://www.dohaup.com/up/2010-05-02/dohaup_1188682837.jpg (http://www.dohaup.com/)

قلب حاني
05-15-2010, 05:28 PM
هنانا بت البطانة
دايما مبدعة
ماأجمل تراثنا الغالي
بس زي ماقالت سوزي
الدااير القاموس كتتتتير ههههه
معليش يا اخواانا شهادة عربية وكده
تسلمي ياعسل

ام سعد
05-26-2010, 06:37 PM
شكرا هنوها وتسلمي ياحبيبة على الاهتمام بتراثنا الرائع
عشان ناس الشهادة العربية ديل والحناكيش اتعرفوا عليه
قلب حاني وسوزي قبل ما اقرا ردكم كنت حاسال هنوها من الجيل البعدنا حيفهم
ولا حيقول ياااااي ده متوحش no ده ارهاب

الفاضلابي
07-06-2010, 10:49 AM
شعر حماسي وتراثي جميل التحيه ليكم دار جعل اهلي اهل الكرم والخير

طبعا يا هنوها الجلد راح ضحيته العديد من اقربائي اولهم جدي الذي يحكى انه

مات متأثر بضربة سوط على كليته وجدي الاخر مات بعد قطع اوردة يده بسبب رفض العريس جلده



واخر مات بعد تلف ظهره تماما من كثرة الجلد وللاسف مازلنا نمارس هذه العادة الضاره

وان شاء الله البيحضر زواجي منكم حيشوف الدم للركب ههههه لاني مجهز عدد 4 سياط مصنوعة بي مواصفات خاصة

طبعا السوط المستخدم في الجلد لايمكن ان يتصوره احد الا بعد تفحصة جيدا فهو عندما ينزل على الظهر اشبه بضربة السيف

وله مقدره عجيبه على احداث جرح عميق في الظهر قد يجعلك تنام على بطنك قرابة الاسبويعن واذا تعدى الجلد 10 جلدات فلن تنام على ظهر قبل شهر

وهناك مواد تستخدم لتنظيف الجروح بعد مرور 4 ايام مثل السمن الحار وقد يضطر الشخص للذهاب الي الطيب للعلاج والتنظيف واخذ بعض المضادات الحيويه

وذلك لانه قد يصاب بإرتفاع حرارة الجسم وغيرها من المضاعفات المصاحبة

نسأل الله ان تندثر منثل هذه العادات الضارة كما اندثر الكثير مثلها

فاطمة
07-06-2010, 12:07 PM
تمااام...بحب الشعر الحماسي جدا...كلام جميييل ياهنو ...تشكري علي الجهد

الطاهر عثمان
07-08-2010, 10:18 AM
بوست عجاجو قايم من الجلد
والله شعر جميل جداً وتراث قيم نفاخر به
حريم زمان ديل كانوا صعبات خلاص
اسه بنونة دي عليك الله ماله علي اخوها
زول مات في امان الله - تقوم تقول دايرالك يوم لقاء بدميك تتوشح