المساعد الشخصي الرقمي

مشاهدة النسخة كاملة : قاموس شايقى


muhjoub
07-18-2010, 12:11 PM
السلام عليكم ورحمة الله تعالى وبركاته
يا شباب لقيت فى أحد المنتديات بعض الكلمات الشايقية ومعانيها وحبيت الناس تستفيد منها والعندو اضافات عليها ما يبخل علينا بيها لتعم المعرفة والاستفادة للجميع
بسم الله نبدأ :
الكرارة : لسحب العجين فى الدوكة ( عواسة الكسرة )

الكركعوب : حصى المنقة والدوم

الكركتى : طين الجروف

يتكن : وضع البذور داخل الأرض وبالذات فوق الجداول.

يمتق : يمتق العيش وهو مرحلة من مراحل نمو الذرة قبيل الحصاد

الخوصة: السكين

الكيم : الركن

الجر : إناء فخاري زي الزير

جاو : نوع من أنواع التمر

أنتقو : جروا ... أنزعه

أرمو : أرميهو بعيد

مبنقر : ناطي

هبتروك : قبضة الذرة (هين من الذرة)

ـ تيلان : السقايي التالتي للنبات

ـ فاريق : الشي البيزرعوه في الجروف جنب النيل.

ـ اركج : الولد البيساعد في الزراعة

ـ أروتي : الولد البيقعد فوق الساقية وهي شغالة

الاشميق : الليف

السلب : الحبال

الدونكه : المطبخ

الكشر : مفتاح الخشب

الديناب : لحجرة الجلوس الكبيرة

الدانقة : للصالة

الدونكا : للمطبخ

الهبود : الرماد

ألارنيق : الامينة تنتصب فى منتصف الحجرة تسند المرق

الكبد : الباب

الكشر : مفتاح الباب

الكتاريق : البيوت المهدمة القديمة

الباريق : الزقاق الضيق

ألارتيق : ظل الجدار الشرقى فى صباح الصيف

التكيقة : شمس الجدار الغربى فى صباح الشتاء

الكرقة : الراكوبة

الكادق : البخسة يحفظ فيها اللبن

الكشمير : مثلث الارجل تعلق منه القربة فيها الماء والسعن فيه الماء او اللبن يخض فتخرج منه الفرصة والروب

البشنتيق : قطع البرش القديم

الكفريق : فصوص القصب الجاف

الدفيق : اول اطوار التمر يكون اخضر ثم يصفر او يحمر فيكون رطبا ثم يصير ام رأس اى يبدأ النضج من رأسه واخيرا يصير تمرا

الكروق : مابقى على جزع النخلة من اصول الجريد بعد قطعه

الطاهر عثمان
07-18-2010, 12:16 PM
ههههه ده عربي يا محجوب
ياخ بالغته تضحك فينا الجماعة اسه

سوزي
07-18-2010, 12:20 PM
طيب يا المحجوب انت كتبت الكلمات ومعانيها كيف نعرف نقراها
اديك فكرة : سجلها بالصوت عشان نعرف النطق الصحيح

muhjoub
07-18-2010, 12:54 PM
ههههه ده عربي يا محجوب
ياخ بالغته تضحك فينا الجماعة اسه
أخونا الطاهر
مرحب بيك
هو عربى أكيد لكن الجماعة ديل ويمكن أغلبية فيهم ما عارفين معانى كلماتنا بدليل اختنا سوزى قالت عايزاهو قاموس ناطق كمان
ههههههههههههههههههههههههه

muhjoub
07-18-2010, 01:00 PM
طيب يا المحجوب انت كتبت الكلمات ومعانيها كيف نعرف نقراها
اديك فكرة : سجلها بالصوت عشان نعرف النطق الصحيح
اختنا الفاضلة - سوزى
حتى انت طلعت شهادة عربية كمان كنت متوقعك فهمتى معانى الكلمات كلها
ههههههههههههههههههههه

سوزي
07-18-2010, 08:39 PM
انا والله يا محجوب ما شهادة عربية
لكن اخوانا الشوايقة عندهم لهجة براهم بعرفوها
مصرة على القاموس الناطق