المساعد الشخصي الرقمي

مشاهدة النسخة كاملة : مقارنات | حب زمان وحب اليوم


muhjoub
07-19-2010, 10:42 PM
للدكتور - طارق جبريل
انتو يا الحبان ولاد الزمن دة يا كافي البلا حتى الحب آآآبيعرفوهو
الله اداهم الماسنجرات والفيس بوك والياهو والتوتر والموبايل والاس ام اس
بعد دة كله حبهم دراب دراب
النبي شوفوا جنس كلامهم في الشريط التحت في قناة النيل الازرق داك
وحات الله يسولوم في جنس نضمي يمين الغنمايي ما يأثر فيها
والله لاهن عارفين يحبوا ولاهم قادرين علي النخجي والجوعير
بالله الواحدة تكتبلو: انا بحب المريخ عشان لعيبتهم ظريفين
يقوم يردلا: ظريفين شنو ياخي ديل وهم ساكت
يمين ان كنت انا ان بقت قالتلي بحب مريخ أم علقة
كنت قلتلا: أنا أصلي غير كورتهم ما قاعدة تعجبني كورة ولا حتى برشلونة
ديل بُطان شنو ديل

يا حليل أيامنا وأيام ود شيقوق
بالله البني تحرن ليها قدام حلتهم لامن الشمس ترقدك كداد
وتقعد تحاحيلا من هني لا هني
واصلو حلتهم دي كلها تبقى اهلك وتسوي الدرب ساساقا ضُمة ضمة
والعجب ان بقى الله اكرمك بي بكاء في حلتهم ولا في بيتهم زاتو
يمين يدينك يبقبقن من حفير الصيوانات واصلك لا تقول اح
والعجب ان دخل لا جوة وجبتلك ترمسة ألت شاي وايدها دقشت في ايدك
يمين تجي منفوخ من لا جوة وماشي شايل ترمستك وتتقدل بي طرف اصابعينك علي النعامة
واصلو ان خلوك يمين في بيت البكاء دة تقرب تفكلك زغروتي
والعجب لو عندهم عرس في حلتهم ولا في بيتهم زاتو
يمين تجيب فرشك وبهيتك وتقعد تضرب في بيبان العرس ديل لامن تلمعن
وتطلع تفتش السباليق ان بقى فيهن شي مكدب
وان بقى عندهم غنم تسقيهن وتجيبلهن القش
ودة كله بس فشان تحاحيلك شوفتا منها

هسي بالله الواحدة تقول ليه: يا تامر يلاكا معاي ياخي عايزة اشتري ملابس داخلية وفوط صحية
وهو يقولها: خلاص لمن تكوني جاهزة مسكلي لي
يمين نحن الملابس الداخليي دي تبقالنا قدحة لا شفناها لا رأيناه
وحتى ان بقينا شفناهن وكتنا داك يمين علي ننهق زي الحمير اكرمكم الله
وكمان جابتلها فوط صحيي... وحات نضري القطن دة شفناهو بعد دخلنا الجامعة
وكتين تنجرح ويقشطولم قطنايي ملياني صبغة يود في الجرح
ديل نصايب شنو ديل

بالله هسي البني تقعد تنتظر في الولد وتشتريلو في الهدايي
جملة الأيمان وكتنا فشان بس تشوفها تسويلك في جنس عمايل
ان بقى عندها اخو يقطع الخميرة من البيت تصاحبو
وان بقى عندها بت خالتا ليها تعرف بنات ود عمك تمشي توصيهن
وبعد دة كله ان بقيت شفتها بعد تلاتة شهور انت كسبان وتعيش عليهن
لامن تجي تاني تحاحيلا من أول جديد واصلو لا تخليلك الجابري ولا زيدان
ولا احمد المصطفى.. بس تقعد تسمع في اغاني النخجي والجوعير ديل
وتتوجع في حوش بيتكم لامن الله يعدلها عليك وتلم فيها تاني وتاخدلك حنك حنكين معاها
والعجب ان بقيت داير تكتبلك ليها جواب
بالله تقعد تحاحي في ابوك لامن تصل الدولاب أليلو وتسرق الريحي ألتو وتبخها في الفلسكاب
وتسويلك وريقات زي البخرات تكتب وتشطب فيهن لامن يجنك الكلمات السمحات
ويخلنها وكت تقراهن تتبسم..
ووكتين تنتهي تقعد اسبوعين تفكر في النصيبة التوصله ليها
وترجع لي المحاحا من جديد.. والعجب ان لقيتها قدامك
من الخلعة تديها الجواب وتقولها اديهو لي اخوكي

وبالله تنتظر عيد الفطر دة من السنة للسنة فشان تجي داخل لاااجوة وتباركلهم العيد
وأصلو الكعكايي الادتك ليها دي لا تاكلها لا تضوقها.. تختها في دولابك وسط الهدوم لامن تعتت وتنشف
وكل يوم تجي تشمها من تحت الهدوم وترجعها تاني.. والقميص الختيت فيه الكعكايي دة
تلبسو من المناسبات للمناسبات...

هسي الله بيسألكم داك حب وأليل البُطان ديل حب

سوزي
07-19-2010, 11:23 PM
فعلا ما في اي مقارنه بين الحب ايام زمان والحب الان
زمان زي ما وصف كاتبنا الحب كان مؤلم وصعب لكنه جميل
لانه الشاب بيقاسي لحد ما يلقى فقط نظرة ول ابتسامه
الايام دي بقى الحب مسخرة ومعليش كثير فيه قلت الحياء
قاعدين في النجايل اثنين اثنين والراقد والقاعد والله الواحد يستحي
يعني السنه الفاتت في الاجازة المناظر الشفتها والله يا انا المتزوجة استحي منها

حاجة كولن كولن
07-19-2010, 11:50 PM
جملة الايمان كلامه صح ١٠٠ ١٠٠ . زمان الحب كان مغامرة بطلها الحبيب، يغامر بس لنظرة زى ما قال الشاعر
فى سبيل نظرة من عيونك احتمل كل ما ألاقى
حبهم كان طاهر كان نبيل، الحبيب بيخاف على المحبوبة ولا يمسها بسوء، اما اليوم حب عنفوانى شبابى، الواحد لو عليهو يعرس من غير عقد، وكلو نجايل وحاجات باردة ، ميتانيييين . وقالو فى الجامعة يخبطو فى بعض ويجرو وراء بعض يعنى الناس لسة فى مرحلة طفولة متأخرة ، وقالو الاستحو ماتو. اللهم احفظ ابناءنا وبناتنا. وشكرا للنقل الراقى يا محجوب