المساعد الشخصي الرقمي

مشاهدة النسخة كاملة : مقتطفات من الدّوبيت ...


الزيادي
07-28-2010, 11:48 PM
نتميّز نحن السّودانيّون عن غيرنا بأن لنا لونيّه من الشِّعِر المتميّز عن غيرنا وهو شِعر الدّوبيت
والدّوبيت يتناول غالباً الفخر والفروسيّه والغزل .. وقد أجاد بعض شُعراء الباديه في هذا الضّرب من الشّعر
وهنا سأتناول نموذج من أشعار الدّوبيت للشاعر عبد الرحمن مكين ( أبو شوقي ) الذي ينتمي لقبيلتي ..
ومن أشعاره في الدّوبيت تناول وصف الطّبيعه والحبيبه ووصف الجّمل الهجين ..
فإلى الجزء الأوّل .

الزيادي
07-28-2010, 11:57 PM
في الغَزَل :
إنجرح الفؤاد والعله زادت علّه
المشوار طويل ..والحيل البشيل انشل
يا معلقنى بحبال الهوى ..وغلبت اتدلّى
وصبِحت مواجِه العُقد الأبت تنحل ..


من شُفتك نسيت نفسي ومشيت بي وراكي
عجبني جمال عيونك والكفل المعلّي قفاكي
يا الصبتيني بي مس الجنون في هواكي
قلبي فقدتو .يا السمحه ..واظنّو معاكي




يا اللادن قوامك ولون اديمك تبرى
شعرك عتمة الليل اب نيازكا تجرى
يا ام حبا مقلقنى ومقلل صبرى
تكتلى فى العشاق من دون قصد ما بتدرى


بعد ما نسيت خلاص اليوم بقيت اتذكر
خطر بى بالى انتى معاى وحالى ميسر
زمن الحظ مخضر ..ما يبس ..ما اتكدر
زمن العز بعيشو ...عند العرب والبندر

البنشاف قريب ورجلى ما بتمشيلو
يتبسم بروق مطرا مكمل ليلو
الظالمنى واتحيرت فى الاشكيلو
حرّاسو النمر ...الزول البجيهو بشيلو


العنّافيه ام كَزَم ..العالى فيكى الدّوف
معشوقك بعاين ..ما بقل الشوف
الأحزان تمادت والقلب ملهوف
وكل دقيقه ينتابو الشعور بالخوف



لمحة سِنّك البرق المعاهو الزِّيف
لو تتبسمى يكُب المطر فى الصيف
شبيهة البُندُق النِّيشانو ليهو عريف
يا العاتى اللّجوج اللِّى العقال ما بقيف


_______________________________________
حاشيه :
1_العنافيه :الناقه الاصيله (يشبه معشوقته بالناقه الاصيله )
الدوف : الصدر
2-لمحة : بريق
الزيف : تيار هواء بارد يصاحب نزول المطر
البندق النيشانو ليهو عريف : يقصد الكلاشنكوف
العريف :مصغر عُرف بترقيق الراء ..وهو يقصد به مقدمة البندقيه (النيشان )
العاتى ،،اللجوج :كلمات تعنى القوه مع النفور..
العقال : هو قيد يوضع فى رجل الجمل بعد ثنيها حتى لا يسرح بعيدا

لنا عوده مع الجزء الثاني ووصف الطّبيعه .

مجدي امدرمان
07-29-2010, 06:55 AM
حبابك يالزيادي والله وجاد حالك ... هذه التراث السوداني الخالص والله يحتاج لاهتمام اكبر .. الدوبيت هو أحد فنون الشعر المعربّة والخارجة عن أوزان الشعر العربي الخمسة عشر، وللدوبيت خمسة أنواع وأقربها إلى أذن المستمع السوداني هو النوع المسمى : (الرباعي الخالص) ولنذكر مثال : ماقاله قيس البُطانة (المحلق الحمراني) في ابنة عمه وزوجته (تاجوج) الجميلة، يصف عينيها بأنها فص ألماس يزين الذهب المُجمَّر وفي كل ماذهب اليه وذلك حينما أصابته اللوثة العقلية نتيجة طلاقه منها ..
فص الماز مركَّب فوق مجمَّر

فص عينيكِ يا أم خشماً متمَّر

فوق بستان .. تِحِت سالك مَضمَّر

جليدك .. طاقة الكيدي المنمَّر

الزيادي
07-31-2010, 12:15 AM
الله يا مجدي .. واصل هنا هذا الكلام الجميل
وسيستمر الحديث عن الدوبيت هنا بمشيئة الله.

الزيادي
08-04-2010, 08:56 PM
الجزء الثاني
وصف الطبيعه :

البرق البشيل شق السحاب الداكن
مطرو مغيب القلع اب جباهاً ماكِن
الآرام تعج بعد الهدوء السّاكن ..
من تيقا ومشت ..شمال غرب متراكن ..



خريفك زينه ..حنتوتك شبك متطارح
بدان بقرك ..تورهن بجعِّر قارِح
معزول بهمك ..مخيِّل من ضباع وجوارح
رتع بى الوعَر غنمك نباتك صالح


تحِنَى وترزمى ..وتحمى الحوار اللين
سحابه مقنطره ..وعكاز سراتك بيِّن
يصول فحلك يحادى وبالمصاع متطين
يا ام ضرعا مكبس بالحليب متحين..


بدر خريفك ..حنتوتك تشابك نوًر ..
مرح طربان غزالك ..بالعتامير شوًر..
فوق قمم الجبال نفش اقطانو هرعك دوًر ...
زاهيه جميله ..جلً البارى ابدع ..صوًر

جادت دفقت ..سحبك سماكى انقدً
سيلك مشط الوادى وزحف بى شده
زايد فوق حدودو .انفرش واتمدً
اخد يومين كرب ..وأفقك يعد العدًه..
.....
جادت دفقت ..سقت التراب الصايم
من تيقا وتغشت البلد المسمى وخايم
يجوب الافق طربا طيرك مصيدح حايم
يغوص يطفح يسابق الموجه وزك عايم ..



_____________________________
حاشيه :
الحنتوت : نوع من النبات
الجعير : صوت الثور
مخيَل : الخيال قماش قديم يوضع لتخويف الحيوانات المفترسه
رتع : سرح فى الخلاء ليأكل العشب .
تحنًى وترزمى : الحنين هو صوت الابل المفارقه ..الرزم هو الحنين لكن بصوت منخفض
سحابه مقنطره :يقصد السنام
السراة :الشحم الذى يغطى الضلوع .
المصاع : الهياج ..وفى موسم الهياج يرش الجمل البول على ظهره..
متحين : التحين هو امتلاء شطر الناقه بالحليب الى اقصى درجه ..
العتمور :مفرد عتامير ..وهى الكثبان الرمليه ذات الارتفاع المنخفض
الهرع :سحاب سريع الحركه يظهر فى صباحات الخريف بارتفاع منخفض
انفرش : اتسع
تيقا ؛؛ الوخايم :اسماء مناطق ..