إعلان

Collapse
No announcement yet.

أعمل حسابك من الحرامية في الشتاء

Collapse
X
 
  • Filter
  • الوقت
  • Show
Clear All
new posts

  • أعمل حسابك من الحرامية في الشتاء

    والله بقى غالباني الكتابة بالأخص في موضوع عايشنو كل يوم بنشوفو ونسمعو
    قصة الحرامي دي من زماااااان الواحد كان بسمع بيها من الأهل .. جانا حرامي وشال مننا كده وكده
    كل ما الزمن ماشي كل ما أساليب السرقة بتتعدد (للأسف الشديد)، والبوست ده اقتباساً من بوست أخونا كهاتين لم نقل لينا خبر السرقة في نص شوارع العاصمة (بقت عادية للأسف). لو كل واحد فينا دخل البوست وحكى أي موقف كلنا حنخت يدنا على راسنا..
    جانا الشتاء والحرامية كترت.. قبل كم يوم كنت مع إحدى الأرامل في زيارة خاصة، قالت لي أول أمبارح جو حرامية لجيرانا (حرامية يعني ما واحد)، وياريت لو كانو خايفين وسرقو ومشو، لا بصحو ناس البيت ويطلبو: أدينا الموبايل، أدينا القروش (وصلنا مرحلة العصابات).
    القصة دي لو بالليل وبس نقول يلا نقفل ونعمل حسابنا.. لكنها بقت عز النهار، قبل كده (أول مره أحكيها)، كان يوم إجازة جمعة أو سبت ما بتذكر (يعني ناس البيت كلهم قاعدين)، جا ولد شاب وقف قدام باب بيتنا وراكب ليهو عربية كامري موديل جديد يعني لو ما 2009، بكون 2008.. كان باب البيت فاتح لأنو بت أختي مشت الدكان، بكل بساطة دخل البيت.. ودخل لغاية الغرفة أختي انتبهت ليهو وهو طالع من الغرفة (كان في جزء الحريم يعني احتارت ده جا من وين؟؟) بس لحظتها ما فكرت في شي إلا بعد مسافة.. والحمد لله ربنا ستر
    المشكلة قلوبهم بقت قوية.. زمان الحرامي البحكو بيهو بكون زول جبان، محتاج فعلاً لكن الزمن ده ما بتعرف الحرامي من المحتاج من غيرو..
    والمشكلة تكون ماااااااشي في الشارع بكل جراءة عز النهار يسرقوك؟؟ بالمواتر والعربات بالأخص قصة المواتر دي بقت كتيرة بطريقة غريبة، في نص الحلة يجي موتر يسرقك والمواقف كتيرة في هذه المواضيع.
    لو بتكون الحالة دي على فئة معينة قد نلقى ليها عذر، وبعدها نلقى ليها الحل.. لكن لم تجيك فئات مختلفة ما بتقدر تحدد الأسباب..
    والله في ولد شاب أهلو وضعهم كويس، بقى ليهم سبب في فضيحة كل يوم سارق من الجيران حاجة (والمشكلة من جيرانو)، وخاصة الموبايلات.. وما يشوفك أثناء النهار عندك قروش يختك في بالو يعني ده بقول عليهو مريض وليس محتاج..
    ده كلو كلام ما كان فيهو النظر للناحية الدينية التقويم السليم للأسرة منذ البداية مع أننا بقينا في زمن التربية اثرها بزول بزوال المراقبة..
    وقد تكون نهاية السرقة دي نتيجته وفاة ضحية ماليهو ذنب سوى أنه كان بحافظ على بيتو من الدخيل.. بطعنة سكين، وبقت كمان بالأسلحة زي المسدسات اللي بتتباع في أي مكان ومن أي زول.. بتجي هنا الرقابة القلنا عليها قبيل لكن المره دي ما من الأسرة، من المسؤولييييييييييييييييييين والمسؤولين كتار



  • #2
    وفي فئة تانية مفروض تعملو حسابكم منها، الشغالين في البيت ديل كمان بدرسو البيت دراسة من ناحية القاعد منو الساعة الفلانية من الما قاعد، بعملو شنو؟ عندهم شنو؟ دي كمان دايرة رقابة شديدة من ناس البيت والله الغدر بجي منهم ما كلهم لكن في جزء منهم كده..


    Comment


    • #3
      صاح يامنويه وشكرا علي التنبيه

      Comment


      • #4

        تسلمي على المرور بت عجبه


        Comment


        • #5
          انا بقول للمسئولين تخيلوا حال البيرجف فى الشتاء وفى جيبه شائل الدنيا صيف اغلب الناس فى فلس والحرامين يعلمون ذلك شكرا على الموضوع
          Last edited by كمال موسى سيد عثمان; 11-04-2009, 10:37 AM.
          كمال موس سيد عثمان
          مذيع سابق
          السعودية - الرياض

          Comment


          • #6
            والله يا منية الناس كانهم مسحورين
            تغيير كبير جدا حصل في سلوك الشباب
            الموضوع بالجد محتاج لدراسة متانية لمعرفة الاسباب اصل المشكلة
            لان مسالة العقوبة وتشديد الامن والرقابة ما اعتقد حتكون كافية لمنع البيحصل ده
            مفترض الدولة فعلا تكلف جهة ما لدراسة الظاهرة دي واسبابها
            ثم العمل علي حلها والا الوضع حيكون فعلا خطير وماشي للاسوا

            Comment


            • #7
              التطوير كمان مع الحراميه با اكتر من اسلوب

              لازم الحرص مشكوره ياعسل على الموضوع

              Comment


              • #8

                الأخوان: كمال والطاهر والحبيبة بوسي تسلمو على المرور
                حقيقة بلدنا محتاجة كتير.. من الدولة، من الناس العايشة وشايفة، من البيت، من الأهل
                وفعلاً قصة العقوبات ما ردعت ليها زول من ممارسة الجرائم مهما كان نوعها.. قد نكون محتاجين توعية كبيرة، ومحتاجين ما نخلي زول محتاج عشان يفكر يمارس السرقة..
                بوسي منورة ما تطولي الغيبة علينا


                Comment


                • #9
                  ما تقولو الشتاء جاي.. لكن بقينا في زمن مافي فرق بين صيف وشتاء، ليل ونهار، بيت فيهو رجال أو خالي نسوان بس
                  الحرامي بقى أي بيت بيتو، وأي شي في البيت حقو ومستحيل يقبل يطلع من البيت خااااااااااااالي اليدين وأهم شي السلاح
                  قبل كم يوم صديقة لينا ساكنة في المهندسين قالت لي قامت تشرب ليها موية فتحت باب الغرفة لقت قدامها واحد شايل ساطووووووور والله الكويس أنها اتصرفت وقفلت الباب طوالي وبقت تصرخ الحمد لله ربنا يستر علينا ..


                  Comment


                  • #10
                    والله حاجة تحير
                    تسلميييييييييييييييييييييييي منية

                    Comment


                    • #11
                      المشاركة الأصلية كتبت بواسطة منية الله مشاهدة المشاركة
                      ما تقولو الشتاء جاي.. لكن بقينا في زمن مافي فرق بين صيف وشتاء، ليل ونهار، بيت فيهو رجال أو خالي نسوان بس
                      الحرامي بقى أي بيت بيتو، وأي شي في البيت حقو ومستحيل يقبل يطلع من البيت خااااااااااااالي اليدين وأهم شي السلاح
                      قبل كم يوم صديقة لينا ساكنة في المهندسين قالت لي قامت تشرب ليها موية فتحت باب الغرفة لقت قدامها واحد شايل ساطووووووور والله الكويس أنها اتصرفت وقفلت الباب طوالي وبقت تصرخ الحمد لله ربنا يستر علينا ..
                      المهندزيييين؟؟؟الموووهندزييين؟؟ صدقتي والله...
                      عندنا جارة لينا الحرامية مستقصدنها والله بيصحوها قووومي طلعي وادي ومرة ضربو الحبشية ....الله يسترنا يامنيية وحاة الله خوفتيني

                      Comment


                      • #12
                        يا فطومة ياخي انت خايفة براك.. لكن الحرامية عارفين مكان الذهب والقروش وين وعند ناس منو.. عشان كده مستقصدنكم
                        ربنا يحفظكم والحرامي الزمن ده بقى أكثر من جريء


                        Comment


                        • #13
                          شكرا منية الله على الموضوع فعلا انا في فترة الاجازة لاحظت مدى السرقات اذا كان في الشارع اتخطف منك موبايل شنطتك او على مستوى سرقة المنازل ودي بتكون مدروسة مااي بيت بتسرق مثلا في اسرة عندنا مغتربين ومجهزين البيت مما جميعوا من الاثاث والادوات الكهربية بالدبل يعني شقي العمر وحصاد الغربة وهم غير موجوديين والبيت مقفول يفتح فقط في الاجازات وبعيد من اسرهم جاء الحرامية في عز النهار بالدفار والجيران شاهدوا ذلك واعتقدوا اهل البيت راحلين او اي حاجة ماجاء على بالهم انهم حرامية اخذوا كل مافي البيت تركوه جدران فقط فرش واثاث مكدس وحصاد سنيييييييين تسبب ذلك لصاحب البيت بجلطة تركته مشلول لايتحرك ولاينطق بلاي شوفي وصلنا الى وين وبعدين الجيران زمان لو شافو واحد ماشي قريب من حيطة جارو بسالوه انت منو وعايز شنو ماذا حدث لناوين الصفات التي تميزنا عن الاخرين كسودانين بقينا نرجع الاجازة الناس تضحك فينا وتقول انتو من زمن الناس بتعمل كده لاننا وافقين في المكان التركنا اهلنا فيه
                          [frame="11 98"]
                          [/frame]
                          sigpic

                          Comment


                          • #14
                            عليك الله دي حالة؟ شفت الناس وصلت لأي مرحلة ... شفت التطور في عمليات السرقة والاحتيال وغيرو؟ بالأخص قصة السرقة وانت ماشة في الشارع يعني شنطتك ما تشيلي فيها حاجة تشيليها منظر بس (بوبار) او تتحركي بعربية من الباب للباب


                            Comment


                            • #15
                              امس تلفون اختي انسرق من قداماا بدون اي مقدمات و يادوب سافرت ليها 3 ايام

                              غايتو بس الله يعين و يحمينا
                              اللهم أنت ربي لا إلاهـ إلا أنت خلقتني
                              و أنا عبدكـ .. و أنا علىـ عهدكـ ووعدكـ ما إستطعت
                              أعوذ بكـ من شر ما صنعت .. و أبوء لكـ بنعمتكـ علي
                              وأبوء لكـ بذنبي فغفر لي فإنهـ لا يغفر الزنوب إلا أنت

                              Comment

                              Working...
                              X