إعلان

Collapse
No announcement yet.

تجربة العمل من خلال الإنترنت (هنالك دولارات)

Collapse
X
 
  • Filter
  • الوقت
  • Show
Clear All
new posts

  • تجربة العمل من خلال الإنترنت (هنالك دولارات)

    كثيرا ما نرى روابط او مواضيع او ايميلات عن العمل من خلال الانترنت ....

    انا عن نفسي مررت بالعديد من هذه الروابط والايميلات ولم اضغط عليها يوما ما او افتحها
    لاحساسي بان هذا الامر لايعدو ان يكون خداعاً ومحاولة لسرقة ايميل او شي من هذا القبيل ....

    ولكني ساحكي لكم عن تجربتين ناجحتين وتجربة فاشلة في هذا المجال واتمنى من الجميع اثراء الموضوع بتجاربهم
    والاستفادة من تجارب الاخرين ...

    التجربة الاولى:

    هناك نظام في التسويق عموما وفي تسويق استضافة المواقع الالكترونية يسمى بالـ
    Affiliate
    فكرة هذا النظام ان تقوم بتسويق شركة استضافة معينة ونظير كل موقع تقوم بجلبه لهذه الشركة لك نسبة
    والصراحة الخواجات ديل ناس امينين جداً وبيحسبوا ليك حتى الزيارات الي تمت عن طريق رابطك
    انا كنته اصلا مستفيد من خدمة هذه الشركة ومسجل فيها فقلته انا خسران شنو اعمل
    affiliate
    جات جات ما جات انا اصلا محتاج لمواقعهم دي لاني كنته بسجل مواقع جديدة معاهم وهي شركة امريكية محترمة جدا
    يقع ترتيبها تقريبا الخامس من ضمن اكبر شركات الاستضافة في العالم

    عملته كم تسجيل عن طريق الـ affiliate ده وفكرتو بالظبط انو لمه نكون عاوزين نسجل موقع جديد
    برسل انا رابط معين للشخص العايز يشتري - فيضغط عليه ويدخل يكمل عملية الشراء

    وفي امانة دقيقة جدا وبدون ما اكلمهم بلقى طوالي رصيدي زاد

    في فترة بسيطة اخدته من الناس ديل حوالي 125 دولار وفعلا رسلوها لي بدون اي تعقيد وبدون اي مشاكل

    يله في المرة الجاية نحكي ليكم التجربة الفاشلة والتجربة الناجحة

  • #2
    موضوع جميل جدا متشوقين لقراءة بقيته
    (هنالك دولارات )
    ههههههههه ياريت والله

    Comment


    • #3
      والله كويس

      غايتو ادينا الروابط المضمونة

      بعدين يا الطاهر يا أخوي

      القروش البتجي من الجماعة ديل ما تأكلها عيالك يمكن مشكوك فيها

      رسلها لي أنا باكلها براااااي سمح

      Comment


      • #4
        المشاركة الأصلية كتبت بواسطة عبد الرحمن فاروق مشاهدة المشاركة
        والله كويس

        غايتو ادينا الروابط المضمونة

        بعدين يا الطاهر يا أخوي

        القروش البتجي من الجماعة ديل ما تأكلها عيالك يمكن مشكوك فيها

        رسلها لي أنا باكلها براااااي سمح
        ههههههههه
        عبد الرحمن انت برضو عندك عيال يمكن تضرهم رسلها لي انا اذا الطاهر رسلها ليك

        انا صراحة ما اتعاملت في مجال كسب المال عن طريق النت وما عندي تجربة لكن نستفيد من التجارب

        Comment


        • #5
          يا سلام عليك عزيزنا الطاهر دائما ما تتحفنا بالجديد الرهيب ... تجربة رائعة ووننتظر معرفة الفاشلة عشان نعمل حسابنا هههههههههههههه

          Comment


          • #6
            حاجة جميلة وتدعو للتفاول... برضو لو امكن تختلينا الروابط
            مـرّ بـي .. ظـامـئـاً..
            وعـلى جـرف قلبـي ..
            إتـكـى ..
            تـصـفّـحـنـي ..
            وحـيـن لــم يـجـد بـي .. مـاءاً ..
            بــكـى :

            Comment


            • #7
              المشاركة الأصلية كتبت بواسطة ام محمد مشاهدة المشاركة
              موضوع جميل جدا متشوقين لقراءة بقيته
              (هنالك دولارات )
              ههههههههه ياريت والله

              اهلاااا يا ام محمد
              مشكورة للمتابعة وخليك قريب من الدولارات

              Comment


              • #8
                المشاركة الأصلية كتبت بواسطة عبد الرحمن فاروق مشاهدة المشاركة
                والله كويس

                غايتو ادينا الروابط المضمونة

                بعدين يا الطاهر يا أخوي

                القروش البتجي من الجماعة ديل ما تأكلها عيالك يمكن مشكوك فيها

                رسلها لي أنا باكلها براااااي سمح

                غايتو لقيتك صعب
                قلته لي برااااك ما بتاثر

                Comment


                • #9
                  المشاركة الأصلية كتبت بواسطة امير جعفر مشاهدة المشاركة
                  يا سلام عليك عزيزنا الطاهر دائما ما تتحفنا بالجديد الرهيب ... تجربة رائعة ووننتظر معرفة الفاشلة عشان نعمل حسابنا هههههههههههههه

                  اهلااااا حبيبنا امير
                  خليك قريب حتكسب

                  Comment


                  • #10
                    المشاركة الأصلية كتبت بواسطة amofakhry مشاهدة المشاركة
                    حاجة جميلة وتدعو للتفاول... برضو لو امكن تختلينا الروابط

                    منور يا حبيبنا
                    الروابط جاية والدولارات جاية
                    خليكم قريب بس

                    Comment


                    • #11
                      طيب يا اخوانا نواصل ...

                      اولا احكي ليكم عن الشركة دي اسمها site5
                      من كتر الناس ديل ما راقين - نظير كل موقع تتم استضافته معاهم بيقوموا يزرعوا شجرة في مكان ما في العالم
                      محاولة منهم لجعل العالم اخضر والحفاظ علي البيئة ...
                      بالله عليكم شوفوا نحنا قدر شنو بعيدين من الناس ديل وقدر شنو مؤسساتنا ما عندهم اي فهم زي ده ولا عندهم مشاركة اجتماعية
                      يعني نحنا الموية عندنا راقدة والشجر راقد
                      شنو البيمنع انو يكون في تشجير حقيقي للبلد ويكون الدور ده تقوم بيه المؤسسات الخاصة الكبيرة مثل شركات الاتصالات وغيرها

                      طيب ندخل في باقي التجارب
                      بالصدفة كده كان لقيت موضوع في سودانيز اونلاين عن تجربة واحدة من الاخوات مع شركة بتاعة توظيف عن طريق الانترنت
                      وكان مطلوبين موظفين لشركة جوجل
                      الموقع رابطه
                      www.lionbridge.com
                      ممكن تسجلوا فيه وتختوا السي في بتاعكم عليه وهم بيتصلوا بيكم للوظائف المناسبة

                      المهم قمته سجلته في الموقع وقدمته للوظيفة لجوجل وهي عبارة عن وظيفة محلل لنتائج البحث التي تظهر في جوجل وايها افيد للشخص الباحث
                      برضو الحتة دي فيها نقطة مهمة جدا

                      عن التجويد في العمل والمتابعة وخدمة ما بعد البيع
                      يعني جوجل لو كانت شركة سودانية كان ممكن بسهولة تقعد علي ما انجزته وتقعد تمص في القروش من الناس وخلاص
                      لكن لا - الناس ديل عندهم فهم انك يا تطور نفسك وتبعد المنافسين عنك حتى ولو انته رقم 1 يا حتطلع من السوق ده
                      والمنافسة شرسة جداً بين شركات محركات البحث
                      بالاضافة الي اهتمامهم بالعميل وانهم يسعوا لان تجد النتيجة التي تبحث عنها من اول مرة ...

                      قدمته للشغل وبديت في القراية استعدادا للامتحانات والموضوع جادي جدا
                      قراية شديدة وبتفاصيل دقيقة جدا ومقارنات بين نتائج البحث وتحليل ليها
                      والشخص الي بحث عن موضوع قاصد شنو وهل النتيجة الي ظهرت ليهو مرضية وهل مفترض تكون رقم واحد
                      وشنو يكون رقم 2 وقصص كده طويلة جدا وكيف تضع التقييم بتاعك ده وعلي ياتو فهم وبياتو لغة

                      المهم قريت شديد - بس الوقت كان ضيق جدا يومين بالظبط مفترض تهضم المعلومات دي كلها
                      بكل اسف رسبت في الامتحان وما في اي فرصة تانية تعيد او تقدم من جديد لقوقل

                      زعلته كده ونسيت الموضوع لاني كنته قريب جدا من النجاح والدخول في جوجل

                      يله شوية كده ونحكي القصة الثالثة الناجحة

                      Comment


                      • #12
                        والله موضوع جميل يا الطاهر وطبعاً البشد ليهو قصة الدولارات دي وأنا جاية اشيل وأطلع طوالي.. في انتظار القصة الثالثة الناجحة حقت الدولارات


                        Comment


                        • #13
                          اى انا سمعت عن موضوع التجربة التانية دى من قبل بس الناس الىل حكو لى ماصبرو برضو وافتكرو انو الموضوع وهم
                          معلش بالنسبة للتجربة الاولى انا مافهمت الفكرة يعنى انا بحط مواقع ولا بسوق مواقع ؟؟

                          Comment


                          • #14
                            مي - منية مشرفين والله
                            والله الدولارات دي جابتكم كلكم - اصلوا مافي زول علق علي اشياء تانية كتيرة بين السطور بس جارين للقروش

                            طيب يا سادتي ندخل في القصة الثالثة والناجحة ...

                            لفترة طويلة نسيت موضوع lionbridge وكان بتجيني منهم ايميلات كتيرة عن شغل ترجمة وشغل ما عارف شنو
                            لكن ما عارف ليه سبحان الله ما قدمته

                            مرة كده في لحظة تجلي جاني منهم ايميل بانو شركة مايكروسوفت محتاجة لوظيفة محلل نتائج بحث لمدة اسبوع
                            25 ساعة والساعة بـ 9 دولار
                            لو الكلام ده نافع معاك قدم

                            قمته يا زول طوالي قدمته ورسلته السي في بعد كم يوم جاني ايميل بانو تم اختيارك من ضمن مجموعة للعمل في المشروع
                            وحنرسلك العقد واقرارات كده نظام الخواجات داك
                            رسلوا لي العقد والاقرارات وقعك وقعك ورسلتها ليهم

                            قاموا طوالي رسلوا لي الشغل فولدر كبير كده فيه 255 نتيجة بحث


                            وملف اكسل حتى تكتب فيه النتائج
                            المفترض تفتح كل query او سؤال او بحث وتقعد تشوف السؤال او البحث ده وتقعد تحللو
                            وتشوف الشخص الكتب البحث ده يكون قاصد شنو وعايز شنو
                            وتشوف الموقعين وبعداك تعمل تقييم لياتو محرك بحث جاب نتيجة احسن من التانية وليه
                            اهم حاجة ليه دي
                            التقييم بيتكون من كم درجة وهي

                            الموقع اليسار ممتاز شديد
                            الموقع اليسار ممتاز
                            الموقع اليسار ممتاز شوية
                            الموقعين زي بعض كويسات
                            الموقعين زي بعض سيئات
                            الموقع اليمين ممتاز شديد
                            الموقع اليمين ممتاز
                            الموقع اليمين ممتاز شوية

                            وهكذا تجيب تحليل طوالي عكس نتيجتك يعني لو اليمين كويس - الشمال ليه سيئ
                            لو قلته الاتنين كويسات تعلل - لو قلته سيئات تعلل
                            بتقول برضو لو السؤال نفسو ما صحيح او اتكتب غلط او السؤال فيه abuse

                            المهم الحمد لله رغم ضيق الوقت تقريبا 5 أيام بس مفترض تخلص وترسل النتيجة

                            رسلته النتيجة قاموا طوالي رسلوا لي يوزر نيم وباسورد لموقع تبعهم تدخل فيه وتعبي بياناتك بتاعة البنك
                            وتحدد الساعات الاشغلتها بحيث لاتتجاوز 25 ساعة - برضو يعني هم حاسبنها
                            المهم كتبته ليهم انا اشتغلته 24 ساعة وحولوها لقسم تاني عمل عليها موافقة وحولوها لقسم تاني بتاع التحويل
                            وطوالي حولوها لحسابي 24 ساعة في 9 دولار
                            يعني المبلغ ما كبير لكن علي الاقل تجربة انك تشتغل مع مايكروسوفت وتعرف الناس دي بتفكر كيف وتتعامل كيف

                            طبعا الفهمتو من اهتمام الناس ديل انهم عاوزين يقيموا محرك البحث الجديد بتاعهم Binq ويقارنوه مع محركات تانية
                            او احتمال يكونوا عاوزين يشتروا محرك بحث تاني او يندمجوا معاه ...

                            ده كلو طبعا وهم مستهدفين جوجل يعني هم بيتصارعوا مع بعض ومركزين علي جوجل
                            وجوجل بهناك شغال علي مستوى أكبر وفهم أكبر

                            اتمنى من الجميع الالتحاق بشركة lionbridge والناس ديل علي ضمانتي
                            قوليهم بس نحنا من طرف الطاهر وانا بستلم ليكم

                            Comment


                            • #15
                              المشاركة الأصلية كتبت بواسطة may مشاهدة المشاركة
                              اى انا سمعت عن موضوع التجربة التانية دى من قبل بس الناس الىل حكو لى ماصبرو برضو وافتكرو انو الموضوع وهم
                              معلش بالنسبة للتجربة الاولى انا مافهمت الفكرة يعنى انا بحط مواقع ولا بسوق مواقع ؟؟

                              معليش يا مي ما لاحظته سؤالك

                              انتي بتكوني اصلا مشتركة مع الشركة دي ماخدة منهم موقع او عاملة استضافة موقع معاهم
                              بعداك تبدي التسويق لآخرين يجو يسجلوا في نفس الشركة عن طريقك ....

                              لو ما محتاجة لموقع وما عايزة تسجلي وعايزة تعملي تسويق ما عندك مشكلة
                              سوقي لينا وبنقسم مع بعض

                              Comment

                              Working...
                              X