إعلان

Collapse
No announcement yet.

أدب المناحة

Collapse
X
 
  • Filter
  • الوقت
  • Show
Clear All
new posts

  • أدب المناحة

    المناحة أو ادب المناحة جزء أصيل من الثقافة الادبية السودانية .. ربما تعكس كلمة مناحاة صورة صعبة او موحشة الا ان أغاني المناحة بها مفردات موغلة في الحب الحقيقي ونهايات الوفاء واسمى ايات العرفان .. لنفرد مساحة لهذا الادب ولنستفيد منكم فالغربة لم تتح لامثالي التعمق في الادب السوداني الاصيل ، فهلا ساعدتموني ؟؟
    Last edited by مجدي امدرمان; 02-16-2010, 11:19 AM.
    [align=center]العين التي لا تبكي لا تبصر في الواقع شيئاً[/align]

  • #2
    اسرة الخواض او الخواويض وهم من أعلام كبوشية المعروفين وهم من القراري
    ويسكنون منطقة كبوشية شرقا وغربا.. ففي الشرق إلى جانب كبوشية
    يوجد القراري في (كبوشية ، ديم القراي ، قوز الحاج ، والكبوشاب وغيرها)..
    وغربا يوجد معظمهم في (طيبة الخواض، وما جاورها حتى قوز برة وكلى ..)

    وهناك مناحة مشهورة لأحد أعيان القراري في كبوشية وهو

    جدنا المرحوم (اللغا ود الخواض).. وأسمة الحقيقي محمد أحمد إبراهيم الخواض

    واللغا هو لقب أطلقه عليه الأتراك عندما كانو يحكمون السودان في ذلك الوقت

    وهو كان شيخ الخط لمنطقة كبوشية وما جاورها



    وهو رجل كريم جداً وقالت المناحة امرأة فى مناسبة عجيبة .

    إذ يحكى أن هذه المرأة خرجت من قريتها إلى كبوشية لتركب القطر
    وتسافر بحثا عن ولدها الذي اختفى زمنا طويلا وسمعت أنه يقيم في
    كوستي على او كريمة .
    وعندما وصلت المحطة، وكان ما تحمله من مصاريف يكفي لذهابها فقط
    وإن لم تجد ولدها فالله يعلم كيف تعود.. ولكن لحسن حظها صادقت
    اللغا ود الخواض موجودا بالمحطة.. فأخبرته بقصتها.. فقطع لها
    تذاكر سفرها من كبوشية حتى مكان ولدها وكذلك تذاكر العودة..
    فسافرت وهي لا تحمل هم سوء العثور على ابنها ولاتحمل هم العودة ..
    وعند عودتها، نزلت محطة كبوشية، فوجدت الكل واجما حزينا
    وسرعان ما بلغها نبأ وفاة اللغا ود الخواض.. فأنشدت من حينها
    هذه المرثية..
    تقول في مطلعها:

    كم قابّل ضيوفا يعرف أوصافا.. من قديم الدنيا قصّافا
    ....
    وهى تسأل كانها تستنكر او تكذب نبأ الوفا ة

    يا ناظر المحطة.. الليلة القطر شِن جاب؟
    ما جاب اللغا البسفر الركاب ؟؟؟
    قطّاع التذاكر للبعاد.. وقراب
    ..
    يا حليل اللغا القمر البضوي .. وغاب !

    يبكنو عماتو.. التلب اللزوم.. يا دوبا
    أولاد الخواض .. اتواعدو.. وفاتو
    المجلس حكَر.. هم ياخدو شكراتو
    ما بربطوهو ني.. با بقعدو في غلاطو
    عِن(د) موجب الحديث .. قط ما بيتباطو
    اكان لي عمر.. همل لي عقاباتو
    واكان للـ اللغا.. حير لي عشيماتو
    ..
    من المرسلين.. والأنبيا الفاتو
    الموت نحن زرعو وحصدو وبلاداتو
    ومن قديييييم الدنيا قصّافة..
    ....
    ليك أمّا(ن) تقول.. مسّخ عليها الدور
    وفي حينا قريب.. جارت عليها ام جور
    يا التلب اللزوم الـ ماك عِجِل ود تور
    أمر السيد نفد في حكمو شِن بنقول
    من قديم الدنيا قصّافة..

    ومن اسرة الخواض فى كبوشية الخواض حسين النعيم وفى مدنى اولاد العامل
    وهم اولاد ابناء الخواض واسامة الخواض وجلهم ارتبطوا بكبوشية حتى المستقرين
    فى طيبة الخواض ومنهم د. مجزوب الخليفة ربنا يتقبله قبول حسن درس فى كبوشية المتوسطة مع اهلوا .
    أسرة الخواض أسرة زعامة وكرم وشهامة ولها مآثر عديدة يحفظها تراث
    المنطقة.. ومناحة اللغا ودالخواض واحده منها ...
    Last edited by عبد الرحمن فاروق; 02-16-2010, 12:28 PM.

    Comment


    • #3
      ياعبدالرحمن دائما المسعف الاول .. التحية لاهلنا الخواوويض وفي انتظار المزيد لتوثيق هذه الدرر .. المناحة لاتقتصر على اقليم معين دون الاخر فنجد المناحة عند اهلنا في غرب السودان بواسطة الحكامات حينما يرثون فانهن يذكرون ويخلدون مآثر الابطال والفرسان .. وحسبنا ان مرثية الاميرة مندي لوالدها السلطان عجبنا احد سلاطين جبال النوبة والذي قتل في حربه ضد الاستعمار البريطاني خير دليل والان تخلد هذه المناحة باتخاذها مارشا عسكريا من اهم المارشات في الجيش السوداني ... وايضا نجد المناحة في الشمال والشرق والجنوب وبالطبع الوسط نقطة التقاء كل الاعراق السودانية .. نواصل ..
      [align=center]العين التي لا تبكي لا تبصر في الواقع شيئاً[/align]

      Comment


      • #4
        [align=justify]حسب معلوماتي الفقيرة ...تعد مناحة (الوليد الضيف) اشهر المناحات حيث نجد الام الثكلى ترثي فلذة كبدها الضيف الذي قضى العيد مع اصحابه فى القرية واعتقد انها في الكلاكلة حيث سميت المقبرة باسم الوليد الضيف ، كثرت الاقاويل حول حقيقة وملابسات غرق الوليد الضيف وكان في رثاء امه اتهاما بشبهة جنائية وتطرقت ايضا لمكانته بين اخواته وبنات حييه ولم تظهر صراحة بأنه كان على قدر من الوسامة وكل العذارى يتمنون الزواج به ولكن كان يفهم ذلك من خلال النص .
        حليلك يازمن ياعشاي
        حليلك يازمن غناي
        ناس الحله جو والديوان ملوه
        مشوا للبحر وقالوا مالي لقوه
        الوليد الضيف غرقتنوا كيف
        جيبوا لي هدوموا الراقده فوق القيف
        خلوني النمنح بالقرع والسيف واسواد امه الاهله في الجريف
        حليلك ياهدية وحليلك يارضية
        ابكن يابنات قولن ووب احيي حنته بالعشية
        نواصل ونحاول ان نبحر في هذا اللج الاصييل ... وأرجوا التصحيح دائماalign]
        Last edited by مجدي امدرمان; 02-16-2010, 12:39 PM.
        [align=center]العين التي لا تبكي لا تبصر في الواقع شيئاً[/align]

        Comment


        • #5
          مناحة ناظر البشاريين ود كرار

          لود شوراني

          وعندما مات الناظر ود كرار، جاء ود شوراني متأخراً (يوم الصدقة)، المسافة بين أم شديدة وبعلوك ليست قصيرة، وقيل قصيدة الرثاء هذه (نجرها) في الطريق.
          فقال:
          فارس المدرعات العينو ما بتنكال
          ما اتسيطر على الناس بالملك والمال
          راسي وفارس ورايو حال إشكال
          زايلة وفانية راح البيهو راحة البال
          ***
          جيب رسنك فرقتو كبيرة ناظر العامة
          وانفقد البيندار للأمور الهامة
          زايلة وفانية أصلها دار نقاص مي تامة
          جاني الليلة خبرو الزي لدغة السامة

          (جيب رسنك: كناية عن الكرم، تجيب الرسن وهو يديك الراحلة أو الناقة)...
          ***
          ما بشيرلك على ذلة وكلام وفصاحة
          ويمشي معاك لي آخر السؤال براااحة
          إن بقى بري خصمك بصدو قماحة
          وإن بقى مجني ما بتنجيك منو فلاحة
          ***
          راح العندو ضيفان الهجوع مرتاحة
          يكرموا في منازلو ويمشوا منو فراحة
          ساااهل وصفو للداير يقوللو مناحة
          كم وكم كفو بتكفي (رباحة)
          ***
          أب رأياً حاضر عندو ما بجي عارق
          قبال يبقى طول السيف مفكر وفارق
          أب رسوة الصفقتو تخلي خصمو يدارق
          يعجبك وكت يجيك من المكاتب مارق
          ***
          إن حاول تمقلبو بي طريقة غش
          يبقالك هلاك هو النار وإنت القش
          فوق ضهرو اللزوم الراكز المو هش
          راقدين الضعاف من غير زراعة وحش
          ***
          إن دخل المكاتب يمرق الغايسات
          وأن حام برة فيهو الشكرة والسطوات
          ما دام فقدو بكّا العامة والجيهات
          كيف شورتنا نحن اهل الخصوصيات

          Comment


          • #6
            المشاركة الأصلية كتبت بواسطة مجدي امدرمان مشاهدة المشاركة
            [align=justify]حسب معلوماتي الفقيرة ...تعد مناحة (الوليد الضيف) اشهر المناحات حيث نجد الام الثكلى ترثي فلذة كبدها الضيف الذي قضى العيد مع اصحابه فى القرية واعتقد انها في الكلاكلة حيث سميت المقبرة باسم الوليد الضيف ، كثرت الاقاويل حول حقيقة وملابسات غرق الوليد الضيف وكان في رثاء امه اتهاما بشبهة جنائية وتطرقت ايضا لمكانته بين اخواته وبنات حييه ولم تظهر صراحة بأنه كان على قدر من الوسامة وكل العذارى يتمنون الزواج به ولكن كان يفهم ذلك من خلال النص .
            حليلك يازمن ياعشاي
            حليلك يازمن غناي
            ناس الحله جو والديوان ملوه
            مشوا للبحر وقالوا مالي لقوه
            الوليد الضيف غرقتنوا كيف
            جيبوا لي هدوموا الراقده فوق القيف
            خلوني النمنح بالقرع والسيف واسواد امه الاهله في الجريف
            حليلك ياهدية وحليلك يارضية
            ابكن يابنات قولن ووب احيي حنته بالعشية
            نواصل ونحاول ان نبحر في هذا اللج الاصييل ... وأرجوا التصحيح دائماalign]
            أخي مجدي تحياتي

            طبعاً المناحة دي مشهور عندنا شديد نحن أولاد عطبرة

            لأنو بيغنيها الفنان الكبير مصطفى مضوي

            وتخيل الناس بيرقصو عليها وممكن يغنيها ليك في عرس زاااتو

            بس على ما أظن

            المناحة قالتها أمرأة من المنطقة مش ام المتوفى

            يعني هي بتقول الوليد الضيف يعني ضيفهم هم أهل المنطقة

            تقريباَ والله أعلم

            Comment


            • #7
              ما هو الفافنوس

              شاعرة هذه القصيدة هي بنونه بت المك نمر مك الجعليين ولقد قالت هذه القصيدة في أخيها عمارة والذي مات على فراش المرض ولم يمت في ساحة الوغى

              ماهو الفافنوس
              شعر بنونه بت المك نمر

              ما هو الفافنوس ماهو الغليد البوص
              ود المك عريس خيلا بجن عركوس
              احى على سيفه البحد الروس
              ***
              ما دايرالك الميته أم رمادا شح
              دايراك يوم لُقاء بدميك تتوشح
              الميت مسولب والعجاج يكتح
              احى على سيفه البسوى التاح
              ***
              إن وردن بجيك في أول الواردات
              مرنا مو نشيط إن قبلن شاردات
              أسد بيشه المكرمد قمزاته متطابقات
              وبرضع في ضرايع العنز الفاردات
              ***
              كوفيتك الخوده أم عصا بولاد
              ودرعك في أم لهيب زى الشمس وقاد
              وسيفك من سقايتو استعجب الحداد
              وقارحك غير شكال ما بقربه الشدّاد
              ***
              يا جرعة عقود السم
              يا مقنع بنات جعل العزاز من جم
              الخيل عركسن ما قال عدادن كم
              فرتاق حافلن ملاى سروجن دم

              Comment


              • #8
                الواعي ما بوصوه

                مناحة شاعرتها بت مسيمس

                وأتقالت في الشهيد عبد القادر ود حبوبة على ما أظن


                الواعي ما بوصوه من أمس الضحى
                تورى أب قرون ساقوه يا مقنع ولياتو
                الواعي ما بوصوه الفتح الدرب خلى العريب يمشوه
                ***
                غنيت بجيب مسدار
                المكنه بتكاكى جنك مدافع النار
                يا قصر الرجال اللي الفقر عصار
                يا قصر الفراسه اللي الضلع كسار
                يا نار الزبل الما بندركلك حال
                يا رحل الكحل لا بتنزاح ولا بتندار
                عوج الطنضبه الما بتعدلو النار
                درعولو أم خريز العسكر الزنهار
                مأمن بالقماحه اتقدلت ليك برجال
                ***
                الليله عليك غنيت
                بلع الألف كلو قال ولا استكفيت
                يوم جوك للحرب لا سخيت ولا ضليت
                صامت بالقماحه أتفرشت واتغطيت
                دا تور الجواميس العليهو الرك
                دا عقد الحديد لى الحلبى ما بنفك
                دا سم الغدور الفى الحلق عشرق
                منو غيرك دق فى الحراجه مدافع الحق
                ***
                الليله عليك غنيت يا مطرق الجراح
                قلت ليهم عشارى مسكو يفوح
                ما ختف البدينقا وما جفل مجروح
                بلع الألف كلو درب الجبين مطروح
                جابوك بى أم خريز الزدخانه تفوح
                سيفك بشيل الفقر ومعاها ملاح المخ
                ***
                من كوجه وكجيج لي عند بلاد العين
                جابونا الضحى في مركز الكامنين
                الأهبل يقول أدوه عشره سنين
                والعاقل يقول حكموا عليهو بسنتين
                وكتا جانا الجنا الطبق الجنيه في أتنين
                كملت العمد والمشايخه وحلانين
                ***
                ابشر يا صقر ما تكتر الحلقان
                تأكل ليك مطايبا ما لحم سخلان
                تأكل في المطايب ما لحم عيران
                تأكل في المطايب فوق ضهر سلطان
                تتغدى وتفوت كبده وكلا ومصران
                شن منك نقول لامات عقيد مرجان
                ***
                تكلم يا لساني تكلم المنطوق
                عن مدافع الحق الفى مشيها بروق
                قال قاسم اليمين كان اليمين مطلوق
                زى كاسر الأسود ما بشنقوه في السوق
                Last edited by عبد الرحمن فاروق; 02-16-2010, 03:26 PM.

                Comment


                • #9
                  طبعا اشهر المناحات واللي كل ما اقراها ابكي بتاعة الوليد الضيف..
                  و اجملها واصعبها معاني هي مناحة الفافنوس
                  Last edited by فاطمة; 02-16-2010, 02:19 PM.

                  Comment


                  • #10
                    [align=justify]ياعبدالرحمن مشكور على التوضيح ياحبيب ويافاطمة أحيي مرورك الطيب ..المناحاة ايضا تكون لفقد حبيب وارى من وجهة نظري المتواضعة هي اكثر الما وحرقة عندما تعبر عن فقد حبيب ..كيف لا فالحبيب هو المنى والامل واسباب الحياة فلا نشوى بعد فراق الحبيب او الحبيبة ... في رائعة للفنان مصطفى مضوي اغنية مسكين انا .. وهي مرثية فقد فيها الشاب (الشاعر) حبيبته حيث غيبها الموت وكان قاب قوسين اوادنى للزواج بها بل شرع في تجهيزات الزواج ولكن يد القدر كانت اسرع اقدر فكانت هذه المناحاة المؤلمة المحرقة والتي ابكتني كثيرا وكثيرا وكثيرا ...(ارجوا التصحيح حول قصة المناحة) ..[/align]
                    مسكين أنا
                    يا حليلو مشوار السنين
                    حليله قصة حبنا

                    مسكين أنا
                    ما جني أخوات التقيل مسكن لإيدي وحنن
                    وما بشروا الشبان علي وسط البنات البرقصن
                    ما جن بنات حلتنا ماسون دلال ما سرحن
                    وما جلسن جداتي في آخر الصفوف واتبلمن
                    ما جوكي أنتي باركوا ليك ولي خدودك يقبلن
                    وما قالوا لي أنا بيت عيال مبروك عليك ودعن

                    لوحة جمال فنان بديع يتأمله
                    احتار وقف قال الصلاة
                    ريحة دعاش زمن الرشاش عم البنادر والخلا
                    ما سيد بلد ما روعه جد
                    ما تقولوا قل هو الله أحد
                    والنازعات والبسملة
                    من كل بلى تحميها بس تحصنها
                    حليلو مشوار السنين
                    حليلو يا ناس حبنا

                    غيمة سواد تعلن حداد
                    ظلت سمانا وأرضنا
                    طوفان جراد وقت الحصاد
                    أفنى وأباد محصول سنه
                    قلبي أنجرح بعد الفرح
                    ونزيف غزير من دمنا
                    دي الدنيا ما بترحم صغير
                    والدنيا ما بتعرف جنى
                    Last edited by مجدي امدرمان; 02-17-2010, 08:38 AM.
                    [align=center]العين التي لا تبكي لا تبصر في الواقع شيئاً[/align]

                    Comment


                    • #11
                      لا اله الا الله....

                      Comment


                      • #12
                        نعود لهذا الادب الراقي بقصيدة (سلمى) للشاعر السوداني ابراهيم عوض .. كنت امني النفس بمقابلة هذا الشاعر رحمه الله ، فقط عشان اقول ليه لو اتوزع نصف هذا الحب في الدنيا لعاش الناس في سلام ، هي المحبوبة الأولى لكل انسان انها الأم ولا شيء يعدل حب الأم بعد حب الله تعالى ورسوله صلى الله عليه وسلم..... قصيدة سلمى تغنى بها الدكتور عبدالكريم الكابلي باحساس وشجن لايملكه الا الكابلي فقط .. لنذهب لكلمات القصيدة ثم نبحر فيما بين السطور ...


                        سلمى

                        أنا أبكيك للذكرى ويجري مدمعي شعرا
                        أنا أبكيك للماضي وللعهد الذي مرّ
                        وللألحان مرسلة تصوغ الفن والسحر
                        وللأزهار في الوادي حيارى ترقب الفجرا أنا أبكيك للذكرى

                        *****************************

                        أنا أبكيك أن غنت علي الأشجار أطيار
                        وان اترع في قلبي فيض اللحن قيثار
                        أنا أبكيك أن غنى بلحن الحب مزمار
                        أنا أبكيك أن طافت فجاءات وأخطار

                        أنا أبكيك للذكرى

                        *******************

                        عشقت البدر يا سلمى لان البدر محياك
                        عشقت النجم يا سلمى لان النجم سلواك
                        عشقت الروض يا نوري لان الروض غناك
                        هويت الغصن في الوادي لان الغصن حياك
                        عشقت القبر ياحبي لان القبر ضماك
                        عبدت الله في سري لان الله سواك

                        أنا أبكيك للذكرى

                        ***********************

                        لقد هيج ألامي حنين المزهر الباكي
                        وصمت الليل أشجاني فهل سلماي أشجاك
                        وهل صور ماضينا وهل ردد ذكراك
                        يفوق الفن والإنشاد والإشراق معناكى
                        سأبكى كل ما صورت بعقلي دنياك
                        سأبكى كل ما صورت فى قلبى يا دنياك
                        فما أعجبها دنيا سرت بالروح مسراك
                        [align=center]العين التي لا تبكي لا تبصر في الواقع شيئاً[/align]

                        Comment


                        • #13
                          مقدمه موجزه عن الشاعر والصحافي والفنان السوداني ابراهيم عوض بشير / بقلم عبدالله علقم


                          الصحافي الشاعر المرحوم ابراهيم عوض بشير من أكثر الناس بعدا عن الأضواء ومن أكثرهم بساطة وزهدا وعفوية. ولد في القضارف عام 1923م ودرس في القضارف وكسلا والكلية القبطية في الخرطوم وعمل معلما في كسلا ثم موظفا في مركز القضارف وبدأ الكتابة في الصحف باسم "كسلاوي" ولكن كشف أمره ففصله مفتش المركز الانجليزي من وظيفته الحكومية فالتحق بالعمل في صحيفة "الصراحة" ثم مجلة "هنا أم درمان" وتنقل بين عدد من الصحف هي الرأي العام، الصحافة والعلم ، وظل يواصل الكتابة في الصحف من حين لآخر بشكل متقطع حتى قل نشاطه بعد الانتفاضة 1985م وكانت صحيفة الدار هي آخر منابره.

                          كان شاعرا وموسيقيا وهو أول من أدخل آلة العود في مدينة القضارف التي حول داره فيها إلى منتدى أدبي وفني،. غنى له الأستاذ عبدالكريم الكابلي أغنية "مسرح الغرام" و أغنيته الشهيرة "سلمى" التي يقول مطلعها (أنا أبكيك للذكرى ويجري مدمعي شعرا) وهو الذي لحن أغنية "سلمى" و"الجندول". وقد لقيت أغنية سلمى شهرة واسعة على النطاق العربي بالدرجة التي دفعت شاعرا عربيا مغمورا لمحاولة نسب القصيدة إلى نفسه بعد أن أدخل عليها تعديلات طفيفة دون أن يغير في قافيتها ولا ميزانها الشعري فانكشف أمره سريعا على صفحات "الشرق الأوسط". قصيدة سلمى كما معروف لدى قلة قليلة كتبها الشاعر رثاء لوالدته التي صادف رحيلها يوم زواجه وترك ذلك الرحيل جرحا غائرا في نفسه لم تشفه الأيام وتغنى بها الكابلي بعد أكثر من عشرين عاما على تأليفها . أضف إلى ذلك أن ابراهيم عوض بشير كان أيضا يمد يد العون لبعض الفنانين بالمساعدة في اختيار الجيد من الشعر للغناء وهو من أطلع الفنان زيدان ابراهيم على قصيدة ابراهيم ناجي الشهيرة التي تغنى بها زيدان "داوي ناري والتياعي" وكان كذلك ينشد الشعر بصوته الجميل في إذاعة أم درمان.

                          ولأن الرجل كان زاهدا في الشهرة والأضواء مثل زهده في كل شيء فقد ضاع الجزء الكبير من أعماله الشعرية ولكن ما تزال بعض أعماله مجموعة في ديوانه "رياح أكتوبر" الذي لم بر النور بعد وقصائد أخرى متفرقة ما تزال في انتظار النشر، وقد وعد أكثر من مبدع بالاهتمام بهذا الأمر ومن بينهم الفنان الأستاذ عبدالكريم الكابلي والشاعر الأٍستاذ التجاني حاج موسى وجهة أخرى في دولة الإمارات العربية المتحدة ، فإليهم وإلى الأستاذ السموأل خلف الله والقائمين على دور ومراكز النشر وإلى غيرهم من حملة مشاعل التنوير والثقافة في بلادنا،أوجه مناشدتي بطباعة أعمال الشاعر ابراهيم عوض بشير حفاظا على هذه الثروة الأدبية القومية حتى لا تأتي الأيام على ما تبقي منها.
                          [align=center]العين التي لا تبكي لا تبصر في الواقع شيئاً[/align]

                          Comment


                          • #14
                            حقيقة أدب المناحة او شعر الرثاء من الأشعار التي تمس الوجدان والرثاء دائماً ما يكون فيمن فقد شخص ترك فراغا لا يملئه الا هو وما اثاره الاخوان مجدي وعبد الرحمن من حديث في هذا الصدد قمة في الإبداع واستسمحكم للمداخلة في هذا البوست بمرثية هاشم التي كتب كلماتها الشارع المعز عوض وهو من ابناء العريباب شرق مدني في فقد الطفل هاشم يسن الذي أخذه البحر غدرا
                            الدنيا كانت باقي عيد
                            والناس متل شمس الله تدخل في البيوت
                            والشفع البتجارو حبات المطر
                            من غير تشاور الغيم تخش
                            وهاشمك ولاقاعد معاك
                            الناس تبارك عيدها تتمني الفرح لي كل زول
                            والدمعه والاحزان تطش
                            وهاشمك ولاقاعد معاك
                            من الضهر ماشفتي تاني حدا الفريق
                            ماودعتي ذي عادتك وقت ماينوي يلعب
                            او تمش خطواته في نص الطريق
                            مالك ولابخرتي لاحصنتي من شر العيون
                            ماك عارفه كيف خلق الله عينيهم سيوف
                            لابتفرز العدو لاالصديق
                            وولدك تبارك ربك السواه ضوء
                            ياهو نوارت الفريق
                            هاشم رسول الشفع الفي الحله مصلاية الصلاح
                            بصرك اذا مالدنيا قدامك بقت ليلا عميق
                            سمعك وقت يطارشك عمرك يكون*
                            وكتين تكوني براك رفيق
                            داخراه عكاز الكبر*
                            فرشك..
                            غطاك...
                            سبحت صلاتك ومسجدك
                            مطرك نضارك هيبتك*
                            صيفك شتاءك
                            فارسك عديلك منقذك
                            وجعك دواك
                            ياهو البتب يوم فرحتك
                            وياهو البقش دمعة بكاك
                            ساقي العطاشي الفي البلد
                            الدخري طفاي الحريق
                            كل الجهال انجمو يشحدو في اله النوم
                            يغشيه النعاس
                            ماالواطه صيف
                            والرمضه تاكل في العصب والدنيا حر
                            وهاشم ولاهجست خطاه
                            سايقه المشيئه علي البحر
                            سايق معاه اخو الكبير
                            مو كبير عمر
                            ولا الكبر اليخلي الزول يفرق
                            بين بكاء الساقيه وانين التور
                            ولا الكبر البمجد فكرة الضلمه
                            ويفسل للشموس النور
                            ولا الكبر البفرق بين معاني الذات
                            وقول انسان وكلمة زول
                            ولا الكبر البكون وسط الهجيره الضل
                            بباجحك لم تشرب من نبيذ الفرحه
                            والقول اللذيذ المر
                            كبرا قدر مسحة ضراع تربالي لي
                            ضرع الجبين الكل ثانيه يدر
                            وكبرا قدر مايلقي فرصة انو يصبح قدوه
                            او يبقالو عز الصيف مطر
                            البيت بعيد...
                            واحسن ...
                            احسن عشان ضيق الوقت
                            نتوضي منك يابحر
                            اذنك عشان نتوضي منك يابحر
                            اذنك نشيلك في جلدنا ونمشي بيك
                            اذنك نمرقك من ضفافك ونحتفل
                            بي قدلتك وسط البيوت
                            اذنك ندخلك الجوامع ونبتهل*
                            لي الله يحفظ زرقتك
                            اذنك نبوسك يابحر
                            نرجع نكوسك
                            في الشدر في كل غيمه بتنبهل
                            اذنك عشان نلفي المصلين في العصر
                            اذنك نوادعك ونرتحل
                            تاري البحر ماكان معاي
                            واقف يغازل هاشم اللاهسه واقف ومنتظر
                            اذنك اسوق هاشم وامش
                            اذنك نمش
                            اذنك نفوت
                            ولسه بيغازل فيه البحر
                            والغيره جفلت في جواي
                            واتجاوزت كل الخطوط
                            اذنك ادقك يابحر
                            خير لك تلم ادبك عليك
                            لكن وصل تحزيري في اخر رمق
                            تاريه خطف هاشم
                            سرق من بين نهاراتنا الشمس
                            تاري اصطفاه موجه البخيل
                            تاري البحر ماذي ماعارفنوه طيب وود حلال
                            تاريه اناني وابن كلب
                            هوووووووووووووي ياعباد
                            هيييييييييييييييييييييي ياضفاف
                            هوووووووووووووي ياوطن
                            يايمه هووووووووووووووي
                            هاشم غرق
                            سرقه البحر شان يصطفيه
                            مااظنه ضاير يقهرك*
                            بس داير يشوف دماع عينيك
                            في شان يشيلها يسيبها موج
                            وكن التقول انا كنت بناضم في حجر
                            سرحت بعيــــــــد*
                            جفلت بشيش
                            حدرتني لمن خفتها
                            وبي غادي اتخجه الفريق
                            والناس تكورك من طرف
                            لااتنهنهت لاخلت المايك همر*
                            سكتت ولاقلدت حريمنا البصرخن
                            لاولولت لااتجزعت سكتت ولاجابت خبر
                            هو ده يقين شنو الخلاك يمه ولا عليك
                            ذي التقول رسلتي ماشاله البحر
                            مالك ولاسكلبتي لا صدقتي هاشم مابجيك
                            ذي التقول وراك انو بجيك صاد
                            ورجفت شويتين صنقرت
                            قعدت تفتش ريحته في خشم البيوت
                            واتلعثمت*
                            هاشم بعووووم
                            متاااااكده*
                            وروه الجنيات كيف يعوم
                            وكم وري ابوه وعلموه
                            وراه كيف بالكته يتحاشي الغرق
                            وراه كيف يتحدي بي عومة الضهر موج الخطر
                            وراه التبطبط وجرة النفس العميق
                            صالح ابوه مابينه مابين البحر
                            وابرم معاه كمين عهود
                            اتعاهدوا الاتنين يصونوا حياة بعض
                            مع انو هاشم كان صغير
                            لكنه عاد حافظ تمام كل الوعود
                            واتضاحكوه واتصافوه زييييييييين
                            ومن يوموه داك هاشم بحب موج البحر
                            قيفه الامين
                            رمله الدقاق
                            ريحة الجروف
                            شوف المراكب والشراع*
                            المشرع الفوق والتحت
                            وسرب النوارس وقت تطير
                            بابور جناينا الصغار
                            صوت الضفادع حين تفيد
                            شغب السمك جمب الضفاف
                            غضب البحار وقتين تضيق
                            ياداب عرفت انا سر محبته
                            قبل يفوت
                            بي كم شهر نفس التسامح والكرم
                            نفس النصاع الفي البحر
                            ياهو النصاع الفي عيون هاشم
                            وقت يترسفن دهشه وفرح
                            نفس التأثر بالغيوم
                            الغيمه كل ماتزيده موج
                            وتعكر مياه تزيد عدد
                            هاشم بزيد بالغيمه حن*
                            ودايما يحن للمطره ذي ماليه تحن
                            انا بفتكر غايتو المطر في الحله بنزل شانه هو
                            ذي مابظن هاشم بعيش
                            شان المطر ماتشيلو هم
                            هاشم حريف
                            وبعرف براه كيفن يعوم
                            خش ياخي نوم
                            هاشم حريف
                            هاشم بعوم
                            ولابد يعيش
                            لابد يقوم
                            هاشم بعوم*
                            هاشم بقوم
                            واتلخبط القول والبكاء
                            والحله غرقت في الدموع
                            هاشم صحيح شاله البحر
                            مع انو ماسعلو المسيكين ساي*
                            بدور يتوضي فيه
                            لكن براهو بده الخطاء
                            بحر بن كلب
                            موج ود حرام
                            في الحله مافضل نفر
                            كل العباد انخموا لاتال البحر
                            وكلهم مابين مكضب ومامصدق
                            انو مات
                            هاشم هو ماصاحب البحر
                            اجي الزول بيكتل صحبو كيف
                            نسوان علي شفع هناك الكل بعاين للبحر
                            الا هاشمك وحدوه الكان بعاين*
                            جوه عينيه الغدر
                            والدهشه والخوف والحزن
                            ساكنات عيونك لسه ذي
                            ماساكنه في عينين ابوه
                            ومليون تساؤل واحتمال
                            يمكن يكون
                            يمكن يكون
                            اندسه مننا شان مانذاكر لو الدروس
                            هي دروس شنو؟؟
                            والناس مؤجزه من زمن
                            يمكن يكون
                            يمكن يكون
                            بيهاظروا ساي انا عارفاه جنو جري ولعب
                            شيطان خلاص هسع*
                            تلاقيه جوه بضحك منطرب
                            نان النساوين في شنو؟
                            والرجال مابدو للزول الدرب
                            الدنيا عيد ويمكن
                            يمكن يدورو يهنو بالعيد البحر
                            هي عيد شنو؟
                            عيد شنو؟ الفي الحله
                            مما الناس تصلي العيد بفوت
                            يمكن يكون
                            يمكن يكون
                            يمكن يكون
                            يمكن*
                            طيب بكون هاشم غرق
                            يعني تاني ولا بجي
                            وهسع نصد لبيوتنا ساي
                            من وين يجيبولك جواب
                            والناس تفتش لسه فيه
                            مع انو كان واضح عديل
                            هاشم غرق هاشم غرق
                            لكن منو القادر يصدق انو فعلا هسه مات
                            وهو الكان قبل ساعتين ينطط في الفريق
                            ياالله هل
                            ياالله هل ممكن تموت شمسك بدون مايشوفا زول
                            او هل صباحك بتخنق*
                            قبال يوافينا الشروق
                            ياالله هل عادي الملائكه
                            ذيها وذي اي زول ممكن تموت
                            فيزية شنو ال ياالله جذبت روحو لي روح البحر
                            وهو ده موت شنو؟
                            الفي الحله مااختار زول غيرو هو
                            وياموت تقول محتار شدييييييييييد
                            لي انو موت
                            ايه يضيرك لو يعيش
                            وكان يحصل ايه لوذاتو مافات البحر
                            ياريتو لو ماكان في طرف حلتنا نيل
                            ياريتو هاشم كان كفر
                            ومااتوضي يوم اذن اذانك ياعصر
                            ياريتو لو
                            ياريتو لو
                            ياريتو لو
                            اوووف يابحر
                            استغفر الله العظيم
                            ياالله مامعترضه تب
                            لكنه كان قدرك صعب
                            وشمسك هديك سحبت شعاعاتا ومشت
                            والدنيا فاتت للمغيب
                            وماباقي غير اخر شعاع
                            راسم ملامحه علي المياه
                            كنو التقول مادار يفوتها وذاتو حردان منها
                            والنيل ولا علي باله شئ
                            ساكت مصنقع للسماء
                            مبطوح تكنو هو ماقتل
                            والقيف تحسبو دار يقول
                            لكن بخاف غضب البحر
                            ماهو وكتين بيهيج لابعرف عدوه من البكون
                            لي موجه اكتر من صديق
                            بحر بن كلب
                            قيف ود حرام
                            وموتا بلا يعرف يبشتن في البيوت
                            بعرف شنو؟؟
                            لابد تراهو مع القدر
                            متسلبطين كل الخلوق
                            لابراعو لي وجع القلوب
                            لافجعت الامات*
                            ولابيحنو
                            لايوم برحمو
                            هوي ياام رخام
                            ماطول عميرك صابره ساي
                            شن شقه قلبك والمو
                            ياخيه ماتجيبيلي سيرة ها الصبر
                            كضابه كان بنفع وري هاشم يقين
                            وكضابه كان بدي الصبر
                            انشاء الله كل الحله تغرق في شبر
                            انشاء الله كل الناس تموت
                            في شان نشوف حيمشي وين تاني القدر
                            وأ حسرتك
                            فاتك يقينك وعزوتك
                            وأ وجعتك ماتت شموسك وجزوتك
                            وأ غربت البيت بي وراو
                            وأ غربتك
                            وأ عزت القبر اللي جاه*
                            وأ ذلتك
                            يومين ولاهدهتي لانام في خداك
                            يومين ولاجالك ولاعارفاه هسع امسي وين
                            ياربي هسه بكون شرب لبن المغارب قبل نوم
                            ياربي هسه بكون لعب مع ياتو ذول
                            والدنيا موج
                            هسع بكون اتغدي كيف وكيفن فطر
                            شجيش اقبل وشي دونك وامشي وين
                            والحله كان سالتني منك شين اسو
                            وانا ايه اقول
                            حيشانا كيفن ياضني الروح اقنعها
                            وانت البراك علي مجيك عودتها
                            واديتها احساس الوصول
                            ويسين ابوك
                            كيفن يفوت المدرسه ويدخل بيات وش الفصول
                            وبي ياتو عين ممكن يعاين في الكنب
                            شان يفدقك*
                            وكيفن يدرس تاني زول
                            مسخت عليهو المدرسه*
                            ومسخت علينا الحله مسخت المواسم والفصول
                            يومين ولاقادر تجي
                            لادار تبرد جوفي ساي لادار تصد
                            لادار تطمن ارضنا النشفت وراك
                            بي قرب ميعاد الهطول
                            ونفس البحر الرد يونس بي قفاه*
                            الليله مالو اتلبضك
                            مالك سكت فيك الكلام*
                            ذي الكانو قبل ده مابتخبر نضم
                            لادار ترد ...لادار تقول
                            كده يعني ترحل دون اذن
                            جاتك جاتك نفس كيفن تبيت دون تورينا الخبر
                            واغراك بي ايه البحر
                            علشان تفضل حضنه يامحبوب علي
                            وتسيبني للاسي والذهول
                            قصرت في حقك متين
                            علشان تفوتني بلاسبب
                            وانا ياتو مره كسرت خاطرك شان تقوم
                            تكسر بخاطري تودي شمسي علي الافول
                            وات يابحر
                            شان يعني شان يعني اتوحمت بي طينتك
                            وقت جيت اسألك تديني من نفسك نفس
                            او تسلف رحمي منك سنبله
                            جيت ترد دينك وتاخد روح وليدي كمان ربي
                            ماعافيه ليك يانيل جناي
                            وماتنفعك انشاء الله روحو ان كت دايرها تنفعك
                            يتسلبط عليك رملك يخونك ويدفنك
                            وتسيبك القيفه وتفوت*
                            ياتبلعك واطاطنه جب
                            ذي مابلعته بلاسبب*
                            وذي ماخليت دموعنا وراه تصب
                            انشاء الله تنشف في الدرب
                            لاتلقي ترجع منبعك لايحتويك تاني المصب
                            خير لك تمرقو وتجدعوا
                            ادينا ياهو خلاص كفاك
                            وذي مالفظت يونس زمان
                            الليله يانيل الفظوه
                            كده يابحر نديه ليك بي دم وروح
                            وتجيبو راجع جته ساي
                            حارسين ضفافك من متين
                            واخر مطاف تسقينا من حنضل اسأك
                            ودايرنا نرضي وندفنوا
                            مايندفن هاشم اذن مالم تدفنوه البحر
                            وماتشيلو فاتحت موتو ساي مالم يموت هذا البحر

                            Comment


                            • #15
                              اهلا بنت السودان وشرفتي البوست واحييك على اثرائك المنتدى بالمشاركات والردود الهادفة .... مافي شك الرثاء هو أدب رفيع وسامي فهو الوفاء والحب ..يرى النقاد ان للرثاء قالب خاص لا يحيد عنه الشاعر لضيق دائرة المتوفى والصفات التي لحقته مهما بلغ الفقيد من العظمة، واعتبار ان فن الرثاء أضيق دائرة من غيره من سائر فنون الشعر كالغزل والنسيب والمدح ..
                              الحقيقة مرثية الطفل هاشم هزتني جدا جدا فقد وصلني الم الوالدين وذلك الفراغ الكبير بعد فقد فلذة كبده .. اتفق مع النقاد حول اثر الاسلام في الرثاء فقد ظهر هذا التاثير حتى في مرثية هاشم من خلال الاسلوب والالفاظ ففي نهاية المطاف لله مااعطى ولله ماأخذ وليس الرثاء ابدا اعتراض على قضاء الباري عزوجل بل هو تنفيس وترويح عن النفس المكلومة ...
                              والله العتاب وتأنيب النيل وتشخيصه كان بالغ الدقة لان العاطفة كانت حاضرة من اول القصيدة ... لاشيئ يعوض فلذات الاكباد حتى لوكان الثمن تجفيف هذا النيل الذي يبنبوع الحياة .. ونحن نقول يانيل الشراب من غير مياهك لو عسل نفسي بتملوا وعندك السودان أمانة أوع امواجك يعلوا ..
                              شكرا بت السودان على المداخلة وهذه المناحة المؤثرة للغاية وحتى لا انسى غالبا ماتكون المرثية هي وليدة اللحظة وليس بالضرورة ان يكون الكاتب شاعرا بل ابداع اللحظة والموقف .
                              [align=center]العين التي لا تبكي لا تبصر في الواقع شيئاً[/align]

                              Comment

                              Working...
                              X