منتدى منظمة كفالة ورعاية الايتام السودانية

منتدى منظمة كفالة ورعاية الايتام السودانية (http://www.sudanorphans.org/vb/index.php)
-   منتدى الشعر والخواطر (http://www.sudanorphans.org/vb/forumdisplay.php?f=60)
-   -   البن طقطق طق طق (http://www.sudanorphans.org/vb/showthread.php?t=11085)

بت السودان 03-01-2013 12:31 PM

البن طقطق طق طق
 
البن طقطق .. طق طق
البن طق طق .. طقطق في النار
وأنا بيك طقطقتَ اللهفة خمار
وشربتك بكري محبة وريد
تنيتك وبيك غنيت أشعار
وبركتك غاصت جوف الحن
تلّتَ وفجأة بديت أحتار
الرابط بينك وبين البن
متوحد فعلاً ولا هظار

البن ما بدور يقلوهو شديد
وما بيَحَمل وكتين نارو تزيد
وإنت بتتمطق طعم النار
وكتين نتفارق وأمشي بعيد

والبن محروق ما بدي طعم
زي دون ما أشوفك لون العيد
والبن بتقهوج بالإحساس
وإنت بتتقهوج أي وريد

يا سيد البن والبال والكيف
يا منجل سل أساي نضيف
أنا بين دقات البن بلقاك
زول ما بتلوم في حق ضيف
شقيش الغول يندس وراي
تمرق شايلّك درقة وسيف
تقطع أحلام الغول بالصح
تتدحرج بين صحراي خريف
يا زول ياااا كيف ...

ككيفك يا البي طعم البن
غنيتك للبتقريفو صاح
وزرعتك للشايلين الهم
فوق كل شروق وقصيدة أفراح
ومرقتك مني تحدي الليل
نوّمتَ الضلمة وجيتني صباح
يا زول ياااا صاح

كيفنّك وكيف هسع حالك
غنايك ما وراك إنك
بتفرّح بي جيتك فالك
وإنو القمر الطوّل راجيك
شان فرحة ريدك ما طالك
ما نام الليل من قل الضو
ما ونّس وحشة أطفالك
يا زول كيفنك وكيف حالك

وأنا بسأل في البنّات عنك
نطّن من نارن طارن فوق
قالن زاتن دايرات حنّك
دايرات وكتين التنتنة
يطلع صوتن يا رايع منك
وأنا ذاتي بدور النيل والليل
يتزاوجوا يشربوا من دنّك
يا زول كيف حالك وكيفنّك

والبن طقطق طق .. طق في النار
وأنا بيك طقطقتَ اللهفة خمار

نضال حسن الحاج

منية الله 03-06-2013 11:34 AM

طبعاً انا اي شي فيها طقطقة بن بجيها جارية لا شعورياً .. سلمت يا حبيبة

معاذ محمد 03-07-2013 04:06 PM

ههههههه أي حاجة فيها بن ولي قهوة جيبوها لي منية الله طوالي .

منية الله 03-07-2013 04:22 PM

ههههههههههه بن اكيد عرفتها لي دي شنو حاجة ولا كتبتها بالغلط..
لكن انت ما عارف انا سيرة القهوة ساي بتفور لي راسي كيف..

اميرة 03-09-2013 02:57 PM

اقتباس:

المشاركة الأصلية كتبت بواسطة منية الله (المشاركة 120337)
طبعاً انا اي شي فيها طقطقة بن بجيها جارية لا شعورياً .. سلمت يا حبيبة


لكن يا منية لقيتك طقطاقة :pouahahahaha:
وحب الناس مذااااهب انا بجرى لأسكت كب

اميرة 03-09-2013 02:59 PM

ويا بت السودان عليك الله طقطقى كل يوم عشان الجماعة ديل يتلموا ويجوا جارين بهنا

بت السودان 03-10-2013 09:27 PM

ابشري يا اميرة وانا كمان زي منية بتجيبني ريحة قلية البن وطقطقته


الساعة الآن 01:38 AM.

 email: [email protected]
Powered by vBulletin® Version 3.8.10 Beta 1
.Copyright ©2000 - 2019, Jelsoft Enterprises Ltd
المشاركات والآراء المنشورة في منتديات المنظمة سواء كانت بأسماء حقيقية أو مستعارة تـمـثـل وجهة نظر كاتبها
منظمة كفالة ورعاية الأيتام السودانية هي منظمة طوعية خيرية مستقلة غير هادفة للربح تسعى للتنسيق بين الكافل واليتيم مباشرة

Security byi.s.s.w

 

vEhdaa 1.1 by NLP ©2009